Almatyda kóshkin qaýpi bar 7 ýchaske anyqtaldy
ALMATY. KAZINFORM — Almatyda turǵyndar men qala ınfraqurylymy nysandaryna joǵary qaýip tóndirgen kóshkin qaýpi eń joǵary toǵyz ýchaskede betkeılerdi nyǵaıtý jumystary aıaqtaldy.
Almaty ákimdiginiń málimetinshe, Medeý aýdanynda «Medeý» bıik taýly muz aıdyny mańyndaǵy betkeı, «Shymbulaq» taý shańǵysy kýrortyna baratyn avtojol ýchaskesi, «Keńsaı-2» zıratyna aparatyn jol, sondaı-aq «Medeý» bıik taýly sport kesheni aýmaǵyndaǵy «Sarysaı» bógetine aparatyn evakýatsııalyq jol boıyndaǵy betkeıler nyǵaıtyldy.
Sondaı-aq Jetisý aýdanyndaǵy úsh ýchaskede — Qojamııarov kóshesinde, Palladın kóshesiniń boıynda jáne «Kemel» zıraty aýmaǵynda jumystar júrgizilgen. Naýryzbaı aýdanynda «Medeý» tutyný kooperatıvindegi Ýsıkov kóshesiniń boıyndaǵy ýchaske men «Aqjartaý» baý-baqsha seriktestigine kireberis joldaǵy betkeıler bekitilgen.
Betkeılerdi nyǵaıtý jumystary 2025 jylǵy qazanda tabıǵı sıpattaǵy tótenshe jaǵdaıdyń saldaryn joıý jónindegi is-sharalar aıasynda bastalǵan.
Bıyl Jumyldyrý daıyndyǵy, aýmaqtyq jáne azamattyq qorǵanys basqarmasynyń, Almaty qalasy TJD, «Qazseldenqorǵaý» mekemesiniń, Geografııa jáne sý qaýipsizdigi ınstıtýtynyń jáne aýdan ákimdikteriniń mamandarynan quralǵan jumys toby kóshkin úderisteriniń damý qaýpi joǵary taǵy 7 ýchaskeni anyqtady. Qazirgi ýaqytta olar boıynsha jobalyq sheshimder ázirlenip jatyr. Odan keıin betkeılerdi bekitý jumystary júrgiziledi.
— Sel, kóshkin jáne qar kóshkini qaýpi bar ýchaskelerde tótenshe jaǵdaıdyń aldyn alý maqsatynda aqparattyq-eskertý qalqandary ornatylyp jatyr. Sonymen qatar turǵyndar men týrısterge qolaısyz aýa raıy týraly SMS-habarlama arqyly jedel aqparat beriledi. Qaýip deńgeıi joǵary kezeńde Shymbulaq mańyna jáne Úlken Almaty kóline, keıbir taý baǵyttaryna barýǵa ýaqytsha shekteý engiziledi, — dep habarlady ákimdikten.
Eske salaıyq, 2024 jyly 8 aqpan kúni Medeý aýdanynyń Olımpıskıı kóshesi boıynda tehnogendik sıpattaǵy topyraqtyń laılanýynan laı kóshkini boldy.
Keıin Almaty qalasy tótenshe jaǵdaılar departamenti men respýblıkalyq jedel-qutqarý jasaǵynyń kúshteri úıindi astynan 4 adamnyń denesin tapty.
