Almatyda kóshedegi aryqtardyń betin jabýǵa qarsy petıtsııa jarııalandy

Petıtsııa avtory - Tatıana B. jáne ol Almaty qalasy ákiminiń apparatyna baǵyttalǵan.

Petıtsııada Almaty turǵyndary qala kóshelerindegi ashyq aryq jelilerin beton taqtaılarmen jabýǵa qarsy ekenderi kórsetilgen.

- Almatynyń aryq júıesi — jaı ǵana sý aǵatyn jelisi emes, ol mańyzdy gıdrologııalyq, klımattyq jáne estetıkalyq qyzmetterdi atqaratyn biregeı ınjenerlik-ekologııalyq keshen. Ashyq aryqtardy jabyq jerasty qorapshalaryna aınaldyrý megapolıstiń qaýipsizdigine, ekologııasyna jáne tarıhı kelbetine tikeleı zııan keltiredi, - delingen petıtsııa sıpattamasynda.

Sondaı-aq ótinishte aryqtardy jappaý qajettigin dáledeıtin 8 ýáj keltirilgen. Olar qalalyq ortada temperatýranyń kóterilýi, jasyl jelekterge zııany, aýa aınalymynyń buzylýy, sý basý qaýpi, el zańnamasyn buzý, halyqaralyq tájirıbe jáne t.b.

Petıtsııada Almaty ákimdigine qoıylatyn negizgi talaptar da jazylǵan. Onyń ishinde Almaty qalasynyń aýmaǵynda ashyq aryq jelilerin beton taqtaılarmen jabýǵa moratorıı engizý kerektigi kórsetilgen.

Eske salaıyq, bıyl Almaty ákimdigi keı kóshelerde aryqtyń betin beton taqtaılarmen japqan bolatyn. Bul sheshimge keı turǵyndar qarsy shyǵyp, áleýmettik jelide narazylyq bildirdi. Keıin atalǵan jumystarǵa baılanysty Almaty qalasynyń Qoǵamdyq keńistikterdi damytý basqarmasy túsinikteme berdi. Vedomstvo jaýabyna sáıkes, aryqtardyń jekelegen ýchaskelerin jabý - jaıaý júrginshiler baǵyttarynyń qaýipsizdigin qamtamasyz etý, kedergisiz ortany qalyptastyrý maqsatynda keshendi abattandyrý jumystary aıasynda júzege asyrylyp jatyr.

Buǵan deıin Almatyda kóppáterli turǵyn úıdi basqaratyn kompanııa tóńireginde daý shyqty.