Almatyda kóshedegi aǵashtar zańsyz kesilgen
ALMATY. KAZINFORM – Almatynyń Medeý aýdanynda birneshe aǵash ruqsatsyz shabylǵan.
Áleýmettik jelide Medeý aýdany Jamaqaev kóshesiniń boıynda aǵashtar kesilgeni týraly beınejazba jarııalandy. Odan kesilgen aǵashtardyń dińinde eshqandaı aýrý men zaqymdaný belgileri joq ekenin kórýge bolady. Sondaı-aq bul aýmaqta ǵımarat qurylysy júrip jatqany baıqalady.
Almaty qalasynyń ekologııa basqarmasy bul jaǵdaıǵa baılanysty túsinikteme berdi.
- Basqarma qyzmetkerleri atalǵan mekenjaıǵa baryp tekserý júrgizdi. Tekserý barysynda keı aǵashtardyń kesilgeni rastaldy. Basqarma tarapynan atalǵan mekenjaı boıynsha jasyl jelekti otaýǵa eshqandaı ruqsat berilmegen, – dep málimdedi vedomstvodan.
Osyǵan baılanysty aǵashtardy shaýyp tastaǵan uıymnan jasyl jelekterdi kútip-ustaý jáne qorǵaý erejeleriniń talaptaryna sáıkes, 50 eselik kólemde ótemaqy retinde qaıta aǵashtar otyrǵyzý mindettemesi bar kepilhat alynǵan. Jańa aǵashtar ortaq paıdalanylatyn oryndarǵa otyrǵyzylýy tıis. Sonymen qatar polıtsııa qyzmetkerleri de aǵashtardyń zańsyz kesilý deregi boıynsha tekserý júrgizedi.
Eske salaıyq, buǵan deıin Almatyda kóshe ortasynda asqabaq ósip turǵanyn jazǵanbyz.
