Almatyda kóshe uzartý men LRT qurylysyna qansha jer telimi satyp alyndy
ALMATY. KAZINFORM — Almatyda jol-kólik ınfraqurylymyna qatysty jobalardy júzege asyrý úshin jekemenshiktegi jer ýchaskeleri memleket muqtajyna alynyp jatyr.
Buǵan deıin LRT qurylysy úshin Jetisý, Almaly, Áýezov jáne Alataý aýdandarynyń aýmaǵynda ornalasqan ýchaskelerin májbúrli túrde satyp alynatyny belgili boldy.
Kazinform agenttigi Almaty qalasynyń Jer qatynastary basqarmasyna saýal joldap, bul baǵyttaǵy jumys qanshalyqty alǵa jyljyǵanyn surady. Vedomstvo jaýabyna sáıkes, jeńil relsti kólik jelisiniń birinshi kezeńin salý úshin 270 jer telimi jumysqa alynǵan. Onyń ishinde 229 ýchaske ýaqytsha jer paıdalaný quqyǵymen jekemenshikke berilgen. Qazir olardy jalǵa berýdi toqtatý boıynsha jumys júrgizilip jatyr. Taǵy 17 ýchaske ýákiletti organdarǵa tıesili, ıaǵnı satyp alýdy qajet etpeıdi. Al 24 jer telimi jekemenshikte, onyń 18-inde bılbord ornalasqan.
— Qazir 1 ýchaske satyp alyndy. 20 jer teliminiń ıesi ótemaqy somasymen tanysý kezeńinde. Qalǵan 3 ýchaskeni baǵalaý júrgizýge ótinim berildi, — dep habarlady vedomstvo.
Tóle bı, Rysqulov, Jubanov kósheleri — qansha jer alyndy
Tóle bı kóshesin ıAssaýı kóshesinen qala shekarasyna deıin uzartý maqsatynda ákimdik qaýlylaryna sáıkes, barlyǵy 254 jer telimi qaıtarylýǵa tıis bolǵan. Jer qatynastary basqarmasy 2026 jyldyń tamyz aıyndaǵy jaǵdaı boıynsha 253 jer telimi satyp alynǵanyn atap ótti. Bir ýchaske sotta apellıatsııalyq qaralymnan ótip jatyr.
Al Rysqulov dańǵylyn Ońǵarsynova kóshesinen qala shekarasyna deıin uzartýǵa 224 jer telimin memleket muqtajyna alý qajet boldy.
Tamyz aıyndaǵy jaǵdaı boıynsha munda da tek 1 jer telimin satyp alý qalǵan. Qazir qalǵan 223 ýchaske memleket menshigine ótken.
Al Jubanov kóshesin uzartý úshin satyp alynatyn ýchaskeler áli de az emes. Bul jol Momyshuly kóshesinen qala shekarasyna deıin uzartylý tıis. Ol úshin búginde 248 jer telimi satyp alynǵan. Taǵy 16 ýchaske sot óndirisinde bolsa, 15 ýchaske jumys barysynda. Barlyǵy ákimdik qaýlylary boıynsha 279 jer telimi májbúrli túrde alynyp jatyr.
Áleýmettik jelide júrgizýshiler Rysqulov dańǵylynyń jańa ýchaskesinen beınejazbalar jarııalap jatyr. Jeli qoldanýshylarynyń aıtýynsha, kósheniń uzartylyp jatqan bóligi kólikter úshin ashylǵan. Jol jumystary aıaqtalýǵa jaqyn.
Barlyq jumystar tolyq aıaqtalmasa da, Tóle bı kóshesiniń jańa bóligimen de kólikter júrip jatyr. Bul jańalyqpen turǵyndar jelide bólisti.
Eske salaıyq, buǵan deıin Almaty ákimi qyrkúıekte 3 kósheniń uzartylǵan ýchaskeleri ashylatynyn aıtqan bolatyn.
