Almatyda kóshi-qon zańnamasyn buzǵan 35 úndistandyq elden shyǵaryldy
ALMATY. KAZINFORM — Almatyda bir top sheteldik azamat deportatsııalandy.
Qalalyq polıtsııa departamentiniń málimetinshe, Almatydan kóshi-qon zańnamasynyń talaptaryn buzǵan Úndistannyń 35 azamaty Qazaqstan Respýblıkasynyń aýmaǵynan shyǵaryldy.
Olar memlekette bolýǵa ruqsat etilgen merzimnen asyp, el aýmaǵynda zańsyz júrgen.
— Nysanaly is-sharalar barysynda kóshi-qon qyzmeti basqarmasynyń qyzmetkerleri shetel azamattarynyń júrgen jerin anyqtap, olardy ustady. Sot sheshimimen quqyq buzýshylardyń barlyǵy Qazaqstan Respýblıkasynyń aýmaǵynan shyǵarylyp, polıtsııa qyzmetkerleri olardy áýejaıdaǵy shekaralyq jáne pasporttyq baqylaýdan ótkenge deıin alyp júrdi, — dep habarlady departamentten.
Polıtsııa shetel azamattarynyń belgilengen bolý merzimi aıaqtalǵannan keıin olardyń elden ýaqytyly shyǵýyn qamtamasyz etpegen qabyldaýshy taraptar da ákimshilik jaýapkershilikke tartylǵanyn atap ótti.
Eske salaıyq, buǵan deıin Qazaqstanda sheteldik júrgizýshilerdi jazalaıtyn amal tabylǵanyn jazǵanbyz.
