Almatyda kóshi-qon zańnamasyn buzǵan 132 sheteldik el aýmaǵynan shyǵaryldy
ASTANA. KAZINFORM — Almaty qalasynda respýblıkalyq «Mıgrant» jedel-profılaktıkalyq is-sharasynyń qorytyndysy shyǵaryldy, dep habarlaıdy ІІM baspasóz qyzmeti.
Tórt kúnge sozylǵan keshendi shara barysynda polıtsııa qyzmetkerleri kóshi-qon zańnamasy salasyndaǵy quqyq buzýshylyqtardy anyqtaý jáne olardyń aldyn alý baǵytynda aýqymdy tekserý jumystaryn júrgizdi.
Nátıjesinde, 1 040 adam ákimshilik jaýapkershilikke tartylyp, onyń ishinde 132 shetel azamaty Qazaqstan Respýblıkasynyń aýmaǵynan shyǵaryldy.
Anyqtalǵan quqyq buzýshylyqtardyń basym bóligi shetel azamattarynyń elde bolý tártibin saqtamaýyna baılanysty boldy. Osy sanat boıynsha 811 sheteldik jaýapqa tartyldy. Sonymen qatar, shetel azamattarynyń zańdy túrde bolýyn qamtamasyz etpegeni úshin 198 qabyldaýshy tulǵaǵa ákimshilik shara qoldanyldy. Al sheteldik jumys kúshin tartý qaǵıdalaryn buzǵan 31 jumys berýshige qatysty tıisti sheshimder qabyldandy.
Іs-shara barysynda zańsyz kóshi-qon arnasyn uıymdastyrý deregi áshkerelenip, atalǵan fakt boıynsha sotqa deıingi tergep-tekserý bastaldy. Budan bólek, memleketaralyq izdeýde júrgen eki shetel azamaty ustaldy.
Almaty qalasy kóshi-qon qyzmeti basqarmasynyń bastyǵy Erkin Amantaevtyń aıtýynsha, mundaı is-sharalar kóshi-qon salasyndaǵy tártipti júıeleýge jáne zań buzýshylyqtardyń aldyn alýǵa baǵyttalǵan.
— Negizgi maqsat — tek quqyq buzýshylyqtardy anyqtaý ǵana emes, olardyń aldyn alý. Biz barlyq qatysýshylardyń jaýapkershiligin nazarda ustaımyz: shetel azamattary da, olardy qabyldaýshy tulǵalar men jumys berýshiler de zań talaptaryn saqtaýǵa mindetti. Zań — barshaǵa ortaq, — dedi polıtsııa qyzmetkeri.
Almaty qalasynyń polıtsııasy qoǵamdyq tártipti saqtaý, zańdylyqty qamtamasyz etý jáne kóshi-qon zańnamasynyń saqtalýyn baqylaý baǵytyndaǵy jumystardy aldaǵy ýaqytta da júıeli túrde jalǵastyrady.
Osydan buryn Almatyda júk kólikterin zańsyz tirkegen HQO-nyń 5 qyzmetkeri sottalǵanyn jazdyq.
