Almatyda kóshi-qon tártibin buzǵan 21 shetel azamaty elden shyǵaryldy

ALMATY. KAZINFORM — Polıtsııa qyzmetkerleri úsh kúnde Almaly aýdanynda kóshi-qon zańnamasyn buzýdyń 141 deregin anyqtady. 

Onyń ishinde 21 shetel azamaty Qazaqstan Respýblıkasynyń aýmaǵynan shyǵarylyp, taǵy 25 adam jeke basyn anyqtaý jáne ári qaraıǵy qaraý úshin qabyldaý-taratý ornyna ornalastyryldy.

Polıtsııanyń habarlaýynsha, tekserý kezinde shetel azamattarynyń elde bolý tártibin buzýy, zańsyz eńbek qyzmetimen aınalysýy, sondaı-aq sheteldikterdiń elde zańdy bolýyn qamtamasyz etpegen qabyldaýshy taraptyń jaýapkershiligine qatysty derekter anyqtaldy. Budan bólek, tirkeýsiz jáne qujatsyz turý jaǵdaılary tirkeldi.

— Atap aıtqanda, tıisti ruqsat qujattarynsyz eńbek qyzmetin júzege asyrǵan shetel azamattarynyń toby anyqtaldy. Jeke basy anyqtalǵannan keıin olar jaýapkershilikke tartylyp, el aýmaǵynan shyǵaryldy, — delingen polıtsııa taratqan habarlamada.

Qazirgi ýaqytta atalǵan tulǵalardy jumysqa tartqan jumys berýshini jaýapkershilikke tartý máselesi qaralyp jatyr. Sonymen qatar is-shara aıasynda alımenttik mindettemelerdi oryndaýdan jaltaryp júrgen azamattar da anyqtaldy.

Eske salaıyq, buǵan deıin Jańaózende zańsyz kóshi-qon uıymdastyrǵan qylmystyq top ustalǵan edi.