Almatyda kórnekti jazýshy, ǵalym Aqseleý Seıdimbektiń qurmetine memorıaldy taqta ashyldy
Almatyda kórnekti jazýshy, aǵartýshy-ǵalym, etnograf, Qazaqstannyń eńbek sińirgen qaıratkeri, Memlekettik syılyqtyń laýreaty Aqseleý Slanuly Seıdimbektiń qurmetine memorıaldy taqta saltanatty túrde ashyldy, dep habarlaıdy Kazinform Almaty ákimdigine silteme jasap.
Іs-sharaǵa Almaty qalasy ákiminiń orynbasary Arman Qyryqbaev, QR Oqý-aǵartý mınıstrligi Y.Altynsarın atyndaǵy Ulttyq bilim akademııasy Orta bilim ınstıtýty Dıdaktıka zerthanasynyń bas ǵylymı qyzmetkeri, professor Jaýymbaı Qaraev, Memlekettik syılyqtyń ıegeri, jazýshy, dramatýrg Kádirbek Segizbaı, M.Áýezov atyndaǵy Ádebıet jáne óner ınstıtýty dırektorynyń orynbasary Tóráli Qydyr, A.Seıdimbektiń nemeresi Tarlan Seıdimbek jáne t. b. qatysty.
«Búgin súıikti qalamgerimizge osyndaı eskertkish taqtanyń qoıylýy zańdy ári tarıhı turǵydan ádil sheshim dep oılaımyn. Sebebi Aqseleý aǵamyzdyń negizgi shyǵarmashylyq ǵumyry, ónegeli ómiri bizdiń súıikti qalamyz Almatyda ótti. Ol kisiniń shyǵarmalary halqymyzben birge máńgi jasaı beredi. Osynaý ıgilikti istiń júzege asýymen barshańyzdy shyn júrekten quttyqtaımyn», - dedi saltanatty jıynda Almaty qalasy ákiminiń orynbasary Arman Qyryqbaev.
Aıta keteıik, Aqseleý Seıdimbek – otyzdan astam kórkem, ǵylymı-kópshilik jáne monografııalyq kitaptyń avtory. Qazaqstan Jazýshylar odaǵy jáne Qazaqstan Jýrnalıster odaǵy syılyqtarynyń laýreaty. «Qurmet» ordeniniń ıegeri, Qazaqstannyń eńbek sińirgen qaıratkeri. QR Memlekettik syılyǵynyń laýreaty (2004). Ulttyq keńestiń, QR Termınologııa jáne onomastıka komıssııasynyń, Qazaqtyń tarıh jáne mádenıet eskertkishterin qorǵaý qoǵamy ortalyq keńesi prezıdıýmynyń, Ǵylymı qyzmetkerlerdi attestatsııalaý departamenti zertteý komıssııasynyń, «Mádenı mura» memlekettik baǵdarlamasy qoǵamdyq keńesiniń, Qazaqstan Jazýshylar odaǵy basqarmasynyń múshesi bolǵan. «Qazaq ádebıetiniń tarıhy» atty on tomdyqtyń avtorlarynyń biri.
Memorıaldy taqta Almaty qalasy Almaly aýdany Qojamqulov kóshesi 128 úıde (Áıteke bı kóshesiniń qıylysy) ornatyldy.
