Almatyda qor basshysy 15 jastaǵy jasóspirimge bazarda aqsha jınatqan

ALMATY. KAZINFORM – Qaıyrymdylyq qorynyń basshysy 15 jastaǵy jasóspirimdi bazar aýmaǵynda turǵyndardan qarajat jınaýǵa zańsyz tartqany úshin jaýapqa tartyldy.

Almaty qalasynyń kámeletke tolmaǵandardyń isteri jónindegi mamandandyrylǵan aýdanaralyq sotynyń málimetinshe, qor basshysy qaıyrymdylyq qyzmetin retteıtin normalardy buzyp, jasóspirimdi qoǵamdyq oryndarda aqsha jınaýǵa jumyldyrǵan.

Jasóspirim turǵyndardy qaıyrymdylyqqa shaqyryp, shý shyǵaryp, qoǵamdyq tártipti buzǵan.

Sot otyrysynda qor dırektory kinásin tolyq moıyndady. Quqyq buzýshylyq faktileri jasóspirimniń túsindirmesimen jáne jınalǵan dáleldermen rastalǵan.

QR Ákimshilik quqyq buzýshylyq týraly kodeksiniń 128-babynyń 1-bóligi mundaı jaǵdaıda jeke tulǵalarǵa 50 AEK kóleminde aıyppul salýdy qarastyrady. Sot kináliniń jeke basyn jáne aýyrlatatyn mán-jaıdyń joqtyǵyn eskere otyryp, qor basshysyna 196 myń teńgeden asa aıyppul taǵaıyndady.

Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz.

Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.