Almatyda kóppáterli turǵyn úıdi basqaratyn kompanııa tóńireginde daý shyqty
ALMATY. KAZINFORM — Almaty «Han-Tengrı» turǵyn úı kesheniniń tóńireginde daý týyndap, bir top azamat beıneúndeý jasady.
Turǵyndardyń bir toby turǵyn úı keshenin basqarýshy kompanııanyń aýysýyna baılanysty narazylyq bildirgen.
Áleýmettik jelide jarııalanǵan beınejazbada ózin MIB basshysy retinde tanystyrǵan azamat turǵyndar daýysy arqyly saılanyp, munda jyldar boıy jumys istep kele jatqanyn aıtady. Onyń sózinshe, qazir basqarma tarapynan turǵyn úı keshenine ózge basqarýshy kompanııa zańsyz taǵaıyndalǵan.
Bul beıneúndeýge qatysty Almatynyń kommýnaldyq ınfraqurylym jáne turǵyn úı ınspektsııasy basqarmasy jaýap berdi. Vedomstvo 54 úıi bar «Han-Tengrı» kesheniniń burynǵy MIB tóraǵasynyń ókileti toqtatylǵannan keıin turǵyndar basqarmaǵa júgingenin atap ótti.
— Nátıjesinde 44 úı úshin ýaqytsha basqarýshy kompanııa bolyp «Servıs-Group2» JShS taǵaıyndaldy, taǵy 10 úı tikeleı birlesip basqarýǵa ótti. Basqarýshy kompanııany taǵaıyndaý týraly sheshim sotta qaralyp jatyr, — dep málimdedi basqarmadan.
Sonymen qatar vedomstvo jaýabyna sáıkes, turǵyndardyń ótinishteri boıynsha MIB-ke eki jospardan tys tekserý júrgizilgen. Nátıjesinde basqarýshy kompanııaǵa zańbuzýshylyqtardy joıý týraly nusqamalar berilgen, alaıda ol oryndalmaǵan.
— Tekserýlerdiń qorytyndysy boıynsha ákimshilik hattamalar toltyrylyp, materıaldar sotqa jiberildi. MIB 70 AEK mólsherinde aıyppul túrinde ákimshilik jaýapkershilikke tartyldy, — dep habarlady Kommýnaldyq ınfraqurylym jáne turǵyn úı ınspektsııasy basqarmasy.
Eske salaıyq, Almatyda MIB men PIK qyzmetine baqylaý kúsheıgenin jazǵanbyz.
