Almatyda kópqabatty turǵyn úı shatyryndaǵy áıgili úıdiń zańdylyǵy sotta qaralyp jatyr
ALMATY. KAZINFORM – Almatylyqtardyń kópshiligine kópqabatty turǵyn úı shatyrynda salynǵan jeke úı tanys.
9 qabatty turǵyn úıdiń shatyryndaǵy erekshe nysan Almaly aýdanynda, Qazybek bı kóshesi, 154/84 úı mekenjaıynda ornalasqan. Ótken jyly áleýmettik jelide bul úı keńinen talqylanǵan bolatyn.
Odan keıin Almatynyń qala qurylysyn baqylaý basqarmasy úı zańdylyǵyna qatysty sotqa talap-aryz joldady.
Bir jylǵa jýyq ýaqyt ótken soń, Kazinform agenttigi nysan boıynsha qandaı sheshim shyqqanyn anyqtap kórdi. Qala qurylysyn baqylaý basqarmasynyń jaýabyna sáıkes, erekshe úıge qatysty ázirge sot úkimi shyqpady, is qaralyp jatyr.
- Basqarma Almaty qalasy Almaly aýdanynyń №2 aýdandyq sotyna Almaty qalasy, Almaly aýdany, Qazybek bı kóshesi, 154/84 úı, 16-páter mekenjaıynda ornalasqan obektini buzý jáne satyp alý-satý sharttaryn jaramsyz dep taný týraly talap aryz berdi. Qazirgi ýaqytta atalǵan talap aryz birinshi satydaǵy sotta qaralyp jatyr, - delingen vedomstvo jaýabynda.
Sonymen qatar basqarma ókilderi bıyl zańsyz obektilerdi buzýǵa qatysty 22 azamattyq is sotta qaralyp jatqanyn atap ótti.
Aıta ketken jón, Qazybek bı men Jumalıev kósheleriniń qıylysynda ornalasqan úı satýǵa shyǵarylǵan. Habarlandyrýdaǵy málimetke sáıkes, turǵyn úı shatyryndaǵy nysannyń 2001 jyly salynǵany kórsetilgen. Jalpy aýdany - 117 m², al úı tóbesiniń bıiktigi - 2,5 metr. Odan bólek habarlandyrýda 50 m² kóleminde terrasa bar ekeni jazylǵan. Úı ishinde ashanadan bólek shaǵyn monshada da bar. Jalpy nysan quny - 69,5 mln teńge.
Degenmen, úı taǵdyry sotta sheshilip jatqandyqtan, túpkilikti sheshim shyqqanǵa deıin ony zańdy satyp alý múmkindigi joq.
Buǵan deıin Almatyda zań talaptaryn buza otyryp salynǵan 41 nysan tolyq nemese ishinara súrilgenin jazǵanbyz.
