Almatyda kópfýnktsııaly sport ortalyǵy salynyp jatyr
ALMATY. KAZINFORM — Almatyda múmkindigi shekteýli jandarǵa arnalǵan sport ortalyǵynyń qurylysy bastaldy. Bul týraly óńirlik kommýnıkatsııalar qyzmetinde ótken baspasóz máslıhatynda Almaly aýdanynyń ákimi Arman Shamshın málim etti.
— Raıymbek dańǵyly 312 mekenjaıynda ornalasqan múmkindigi shekteýli jandarǵa arnalǵan sport ortalyǵynyń qurylysy erekshe mańyzǵa ıe. Kópfýnktsııaly bul ortalyq erekshe qajettiligi bar adamdardy saýyqtyrý men jattyqtyrýǵa arnalǵan. Qurylys jumystary maýsym aıynda bastaldy. 2026 jyldyń qarasha aıynda aıaqtaýdy josparlap otyrmyz. Bıýdjeti — 3,9 mlrd teńge, — deıdi aýdan ákimi.
Arman Shamshınniń sózinshe, Almaly aýdanynda bıyl 1500 oryndyq jańa mektep pen «Shabyt» oqýshylar saraıy paıdalanýǵa berildi.
— Aýdanda jalpy sany 43 mektep jumys isteıdi, onyń 29-y memlekettik te, 14-i jeke menshik mektep. № 58 mektepke qosymsha 600 oryndyq japsarlas jaı salynyp jatyr. № 16 mektepte de týra osyndaı 300 oryndyq japsarlas ǵımaratty salýdy bastadyq, onyń qurylysy 2026 jyldyń ekinshi toqsanynda aıaqtalyp qalady, — deıdi ol.
Budan bólek, 4 mektepti seısmıkalyq turǵyda berik qylý jumysy da qolǵa alyndy. Bıyl № 10, 13, 21, 43 pen memlekettiń menshigine qaıtarylǵan «Teremok» balabaqshasynda jóndeý men seısmıkalyq kúsheıtý jumystary bastaldy.
– Qazir qurylys basqarmasy Tastaq shaǵynaýdanynda 240 oryndyq jańa balabaqsha salý úshin baıqaý ótkizip jatyr. Qurylys osy jyldyń tamyz aıynda bastalyp, 2026 jyldyń tamyzynda aıaqtalady. Sonymen birge, 13 balabaqshada bıyl jóndeý jumysyn bastaımyz, — dep tolyqtyrdy ákim.
Spıkerdiń sózinshe, áleýmettik ınfraqurylymnyń taǵy bir mańyzdy baǵyty — densaýlyq saqtaý salasy.
— № 3 qalalyq emhana kúrdeli jóndeýdep ótip, jaqynda paıdalanýǵa berilmek. Tórekulov kóshesi men Jibek joly dańǵylynda ornalasqan adam reprodýktsııasy qalalyq ortalyǵynyń eki korpýsyn jańalaý jumystary aıaqtalýǵa jaqyn. Qurylys basqarmasy № 1 perzenthana jáne Áıteke bı — Masanshy kósheleriniń qıylysynda 500 adam qabyldaıtyn emhana qurylysy boıynsha (memlekettik saraptamanyń qorytyndysy 2025 jylǵy 14 sáýirde alynǵan, qurylys somasy — 9 301 mln tg) merdiger uıymdy anyqtaý maqsatynda baıqaý ótkizip jatyr. Qurylys-montaj jumystaryn shilde men qyrkúıek aıynda bastaý josparlanyp otyr, — dedi aýdan ákimi.
Osyǵan deıin Almatyda qandaı áleýmettik nysandar salynyp, jóndeletini týraly jazǵanbyz.