Almatyda kóp jyldyq aǵashtardy kóshirýge arnalǵan tehnıka alynady

ALMATY. KAZINFORM – Almaly aýdanynyń turǵyndarymen kezdesýi kezinde Almaty ákimi kóp jyldyq aǵashtar arnaıy tehnıka arqyly kóshiriletinin aıtty.

Qala turǵyny Almaly aýdanynda salynyp jatqan jańa turǵyn úı kesheniniń janyndaǵy Qyzyl kitapqa engen kóp jyldyq aǵashtarǵa qaýip tónip turǵanyna shaǵymdandy. Onyń aıtýynsha, qurylys kompanııasy 80 jyldaı jaıqalyp turǵan japyraqty emenderdi shabýyp tastaýy múmkin.

Shahar basshysy bul aǵashtar shabylmaıtynyn aıtyp jaýap berdi.

- Men jasyrmaımyn, bul máselemen “Korporatsııa VEK” kompanııasy aınalysyp jatyr. Biz bylaı kelistik: kóktem kezinde jańa tehnıka kelýi kerek, ony satyp alyp qoıdyq. Olar kóp jyldyq aǵashtardyń ornyn aýystyrýǵa kómektesetin bolady. Ol jerde másele - parkıng joq. Men Ekologııa basqarmasyna osy jumysty birige atqarýǵa tapsyrma berdim. Eýropada sekildi aǵashtardyń ornyn aýystyramyz, olar ólip qalmaıdy. Naýryz aıynda tehnıka kelse, sáýir-mamyr aılarynda bul jumysty isteımiz. Al kompanııaǵa biz túbegeıli sheshim qabyldaǵanǵa deıin eshteńe istemeýge tapsyrma berildi, - dedi Erbolat Dosaev.

Eske salaıyq, buǵan deıin Álııa men Mánshúk atyndaǵy saıabaqta Qyzyl kitapqa engen emen aǵashy kesilgenin jazǵanbyz.