Almatyda kóp jyl boıy qurylysy bitpegen nysandar qashan buzylady
ALMATY. KAZINFORM — Almaty qalasynda 1988 jyldan bastap ár jyldary qurylysy toqtap qalǵan 13 nysan bar. Kazinform tilshisi aıaqtalmaǵan ǵımarattarǵa baılanysty jaýapty mekemege saýal joldady.
Qala qurylysyn baqylaý basqarmasy agenttik saýalyna jaýap bere otyryp, qurylysy bitpegen nysandardyń tizimin usyndy. Sonymen qatar olardyń qazirgi tehnıkalyq jaı-kúıi jáne árqaısysyna qatysty aldaǵy josparlary habarlady.
Almaly aýdany
1. Panfılov kóshesi, 156 mekenjaıyndaǵy ǵımarat
Iesi: jeke tulǵa
Tehnıkalyq jaǵdaıy: qurylys-montajdaý jumystary 2015 jyly bastalyp, toqtap qalǵan.
Tehnıkalyq zertteý júrgizý, onyń qorytyndy boıynsha usynystardy oryndaý jáne obektidegi jumystardy ýaqytsha toqtatý týraly akt rásimdeýdi mindetteıtin nusqama berilgen. Almaty qalasynyń mamandandyrylǵan aýdanaralyq ekonomıkalyq sotyna nusqamany májbúrlep oryndatý týraly talap aryz berildi. 2024 jylǵy 2 shildedegi sot sheshimimen talap qanaǵattandyrylyp, oryndaý úshin is Ádilet departamentine jiberildi.
2. Amangeldi kóshesi, 52 mekenjaıynda 8 qabatty ákimshilik ǵımarat
Tapsyrys berýshi: «Almatygorremstroı» AQ
Tehnıkalyq jaǵdaıy: qurylys jumystary 2000 jyly 8-qabat deńgeıinde toqtatylǵan.
Tehnıkalyq zertteý júrgizý jáne qorytyndysy boıynsha usynystardy oryndaý jóninde nusqama berilgen. Tapsyrys berýshi obektiniń tehnıkalyq jaı-kúıi týraly qorytyndyny tapsyrǵan. Qazirgi tańda nusqama oryndalǵan.
3. Abaı dańǵyly men Tilendıev kóshesiniń qıylysyndaǵy bıznes-ortalyq qurylysy
Tapsyrys berýshi: jeke tulǵa (buryn — «Korporatsııa Qýat» AQ)
Tehnıkalyq jaǵdaıy: qurylys jumystary 2006 jyly bastalyp, 2008 jyly 10-qabat deńgeıinde toqtaǵan.
2024 jyly jer teliminiń jańa ıesine tehnıkalyq zertteý júrgizý jáne qorytyndy negizinde tıisti sharalar qabyldaý jóninde nusqama berilgen. Sol jyly qurylysy aıaqtalmaǵan nysandy buzyp, ákimshilik ǵımarat pen qyzmet kórsetý nysandaryn salý úshin arhıtektýralyq-josparlaý tapsyrmasyn alý týraly ótinish túsken. Nusqama oryndaldy.
4. Masanshy — Jambyl kósheleriniń qıylysyndaǵy 170 oryndyq jataqhana
Tapsyrys berýshi: «A.Seleznev atyndaǵy Almaty horeografııalyq ýchılışesi» RMK
Tehnıkalyq jaǵdaıy: qurylys jumystary 2014 jyly bastalyp, 2-qabat deńgeıinde toqtaǵan.
Nysandy tehnıkalyq tekserýden ótkizý, qorytyndy negizinde usynystardy oryndaý jáne tıisti aktimen birge konservatsııalaý boıynsha nusqama berilgen. Iesi ǵımarattyń tehnıkalyq jaı-kúıi týraly qorytyndyny tapsyrdy. Nusqama oryndalǵan.
5. Sharıpova kóshesiniń batysy men Qurmanǵazy kóshesiniń ońtústiginde ornalasqan Zerthanalyq-klınıkalyq korpýs
Tapsyrys berýshi: Densaýlyq saqtaý mınıstrligi
Tehnıkalyq jaǵdaıy: qurylysy 1983 jyly bastalyp, 1988 jyly toqtaǵan.
Tehnıkalyq zertteý júrgizý, qorytyndy negizinde usynystardy oryndaý nusqama berilgen. Tehnıkalyq jaǵdaı týraly qorytyndy usynylyp, nusqama oryndalǵan. Alaıda keıinirek qaıtadan zertteý men konservatsııa júrgizý jóninde jańa nusqama berildi. Qazirgi tańda nusqamany májbúrlep oryndatý týraly sot protsesi júrip jatyr.
Medeý aýdany
6. Dostyq dańǵylynyń men Nıýton kóshesiniń qıylysyndaǵy turǵyn úı kesheni
Tapsyrys berýshi: jeke tulǵa
Tehnıkalyq jaǵdaıy: qurylysy 2005 jyly bastalyp, 2007 jyly toqtaǵan. Sot sheshimimen nysan buzyldy.
7. «Gornyı gıgant» shaǵyn aýdany, Dostyq dańǵylynyń batysyndaǵy turǵyn úı kesheni
Tapsyrys berýshi: «Cargo Rich Soul Group» JShS
Tehnıkalyq jaǵdaıy: qurylysy 2015 jyly bastalyp, 2016 jyly 1-qabat deńgeıinde toqtaǵan.
Tehnıkalyq zertteý júrgizý jáne ony oryndaý jóninde nusqama berilgen. Qazirgi ýaqytta nusqamany májbúrlep oryndatý týraly talap-aryz berildi.
8. Ál-Farabı-Meńdiqulov kósheleriniń qıylysyndaǵy kópqabatty avtoturaq
Tapsyrys berýshi: «Sert» AQ
Tehnıkalyq jaǵdaıy: qurylysy 2007 jyly bastalyp, 2009 jyly 2-qabat deńgeıinde toqtap qalǵan. Jer telimi Qalalyq mobıldilik basqarmasyna jobany iske asyrý úshin berilgen. Qazir nysandy súrý jumystary júrip jatyr.
9. «Alataý» ınnovatsııalyq tehnologııalar parki» arnaıy ekonomıkalyq aımaǵyndaǵy kolledj
Tapsyrys berýshi: «Almaty» ÁKK» AQ
Tehnıkalyq jaǵdaıy: qurylysy 2014 jyly bastalyp, 2015 jyly toqtaǵan.
Tehnıkalyq zertteý júrgizý jóninde nusqama berilgen, biraq oryndalmaǵan. Qazir Almaty qalasynyń mamandandyrylǵan aýdanaralyq ekonomıkalyq sotyna nusqamany oryndatý týraly talap aryz berilgen.
10. Ibragımov kóshesi, 7 mekenjaıyndaǵy ǵylymı-zertteý ortalyǵy
Tapsyrys berýshi: «Innovatsııalyq jáne aqparattyq tehnologııalar ortalyǵy» JShS, quryltaıshysy — «Nursultan Nazarbaevtyń bilim qory» qoǵamdyq qory
Tehnıkalyq jaǵdaıy: qurylysy 2014 jyly bastalyp, 3 jáne 5-qabat deńgeıinde toqtaǵan.
Tehnıkalyq zertteý júrgizý jóninde nusqama berilgen. Nusqamany oryndatý boıynsha sot otyrysy aldaǵy ýaqytta bastalady.
11. Gornaıa kóshesi, 440 mekenjaıyndaǵy 125 oryndyq ǵımaratqa qosymsha qurylys
Tapsyrys berýshi: «Balbulaq» Respýblıkalyq balalardy ońaltý ortalyǵy» RMK
Tehnıkalyq jaǵdaıy: qurylysy 2006 jyly bastalyp, 2008 jyldan beri 1-qabat deńgeıinde toqtaǵan.
Nysannyń tehnıkalyq jaı-kúıi týraly qorytyndy negizinde usynystardy oryndaý jóninde nusqama berilgen. Nusqamany oryndatý týraly talap aryz qanaǵattandyryldy. Ony qaıta qaraýǵa 20 maýsymǵa deıin ótinish bere alady.
Túrksib aýdany
12. Krasnogorskaıa kóshesi 52/1 jáne 52A mekenjaıyndaǵy 120 páterge eki turǵyn úı
Tapsyrys berýshi: Qazaqstan Respýblıkasy Qarýly Kúshteriniń Áskerı ınfraqurylym bas basqarmasy
Tehnıkalyq jaǵdaıy: qurylysy 2012 jyly bastalyp, 2014 jyly toqtaǵan. Nysan Qurylys basqarmasynyń menshigine berilgen. Qazirgi tańda tehnıkalyq zertteý júrgizip, jobalyq-smetalyq qujattama ázirleý josparlanyp otyr.
Alataý aýdany
13. Rysqulov dańǵyly men Momyshuly kóshesiniń qıylysyndaǵy kópfýnktsıonaldy ortalyq
Tapsyrys berýshi: A.Egemberdıev
Tehnıkalyq jaǵdaıy: qurylysy 2021 jyly 5-qabat deńgeıinde toqtaǵan. Nysanǵa sharalar qabyldaý úshin jospardan tys tekserý bastaldy.
Eske salaıyq, buǵan deıin Almatyda Saıran kóliniń mańynda qurylysy aıaqtalmaǵan ǵımarat buzylatynyn jazǵanbyz.
2022 jyldyń basynan 2025 jyldyń mamyryna deıin Almatyda ruqsatsyz salynǵan 88 nysan tolyǵymen nemese jartylaı buzylǵan.