Almatyda kóp áıel alý týraly kontent taratqan azamat polıtsııaǵa jetkizildi
ALMATY. KAZINFORM — Almaty polıtsııasy quqyqqa qaıshy kontent avtorymen profılaktıkalyq áńgimelesý júrgizdi.
Keıingi kúnderi BAQ pen áleýmettik jelide kópáıeldik týraly kontent avtory Baýyrjan Baqytjanulynyń beınematerıaldary keńinen talqylandy. Bul máselege tártip saqshylary da nazar aýdarǵan.
Qalalyq polıtsııa departamentiniń málimetinshe, áleýmettik jelilerge júrgizilgen monıtorıng kezinde QR zańnamasyna jáne qoǵamda qalyptasqan jalpyǵa ortaq moraldyq-adamgershilik qundylyqtarǵa qaıshy ómir saltyn ashyq túrde nasıhattaǵan jarııalanymdar anyqtalǵan.
— Avtordyń jeke basy anyqtaldy. Oǵan quqyqqa qaıshy kontent ornalastyrǵany úshin QR ÁQBtK 456-2-babynyń 3-1-bóligi boıynsha ákimshilik quqyq buzýshylyq týraly hattama toltyryldy. Profılaktıkalyq áńgimelesý júrgizilgennen keıin azamat áleýmettik jelidegi paraqshasynan jarııalanǵan materıaldardy óz erkimen óshirdi, — dep habarlady departamentten.
Almaty polıtsııasy áleýmettik jeliler qoǵamdyq aqparattyq keńistik ekenin eske saldy. Tártip saqshylary zań talaptaryna jáne otbasy ınstıtýtyna degen qurmetti tómendetetin kontentti taratý zańda kózdelgen jaýapkershilikke ákep soǵatynyn eskertti.
Buǵan deıin mektepterdegi zańsyz ýaǵyz ben kópáıeldilik nasıhatyna tosqaýyl qoıý usynylǵan bolatyn.
