Almatyda kóne mektepterdiń biri súrilip jatyr — ákimdik túsinikteme berdi

ALMATY. KAZINFORM — Almaty ákimdigi № 56 mektep ǵımaratyn súrý týraly aqparatqa qatysty málimdeme jasady.

Áleýmettik jelilerde jáne BAQ betterinde 56 mektep-gımnazııasynyń ǵımaraty súrilip jatqany týraly aqparat tarady. Beınejazbadan jumysshylar bilim ordasynyń qasbetin buzyp jatqanyn kórýge bolady.

Alaıda Almaty qalasynyń qurylys basqarmasy № 56 mektep-gımnazııa ǵımaratyn súrý týraly aqparattyń shyndyqqa janaspaıtynyn habarlady.

— Mektepte seısmıkalyq kúsheıtý jáne kúrdeli jóndeý jumystary júrgizilip jatyr. Qoldanystaǵy ǵımarattardy súrý qarastyrylmaǵan. Sonymen qatar ǵımarattyń tarıhı qasbeti saqtalady, — dedi basqarmadan.

Vedomstvo málimetinshe, joba aıasynda zamanaýı bilim berý standarttaryna saı oqý keńistikterin qurý kózdelgen. Negizgi jáne beıindik pánder boıynsha sabaq ótkizýge arnalǵan synyptar, zerthanalar men kabınetter jańartylady. Hımııa, fızıka jáne bıologııa kabınetteri zamanaýı zerthanalyq qural-jabdyqtarmen qamtamasyz etilip, oqýshylarǵa tájirıbelik daǵdylardy meńgerýge jáne zertteý jumystaryn júrgizýge múmkindik beredi.

Joba quramynda kópfýnktsıonaldy sport keshenin salý da bar. Mektep aýmaǵynda ashyq sport alańdary paıda bolady.

— Sonymen qatar keń demalys aımaqtary, zamanaýı ashana, kitaphana, oqý zaldary jáne mýltımedııalyq quraldarmen jabdyqtalǵan úıirme bólmeleri qarastyrylǵan. Qurylys-montajdaý jumystary 2026 jyly sáýirde aıaqtalady dep josparlanǵan. Bas merdiger — «Astana-Stroıınvest» korporatsııasy JShS, — dep málimdedi vedomstvodan.

Eske salaıyq, Almatyda Respýblıka kúnine oraı tórt jańa mektep ashyldy.