Almatyda kóne qorǵan nelikten buzylyp jatyr - ákimdik jaýaby
ALMATY. KAZINFORM – Almaty turǵyny áleýmettik jelide Jandosov pen Rozybakıev kósheleriniń qıylysynan tómen ornalasqan qorǵannyń buzylyp jatqanyn aıtyp, oǵan narazylyǵyn bildirdi.
Onyń aıtýynsha, bul qorǵan erte temir dáýirine — bizdiń zamanymyzǵa deıingi VII–V ǵasyrlardaǵy saq kezeńine jatady. Nysannyń jasy shamamen 2500 jyl dep baǵalanǵan. Úıindiniń bıiktigi — 6 metrge jýyq, al dıametri — 60 metrdeı.
Qala ákimdigi Bostandyq aýdanyndaǵy 20-shy jeli kóshesinde ornalasqan bul qorǵandy 2015 jyly Almaty qalasy mýzeıler birlestiginiń mamandary zerttegenin málimdedi. Sol jyly Mádenıet basqarmasy bul nysandy Jergilikti mańyzy bar tarıh jáne mádenıet eskertkishteriniń memlekettik tiziminen shyǵaryp tastaǵan. Buǵan nysannyń kóp jyldar boıy buzylyp, nashar kúıge túsýi, sonyń nátıjesinde tarıhı-mádenı qundylyǵyn joǵaltýy sebep bolǵan.
- Qorǵan apatty jaǵdaıda boldy: úıindi tolyǵymen derlik buzylǵan, al nysannyń ózi uzaq ýaqyt boıy antropogendik áserge ushyrap kelgen. 2024 jyly «Arheologııalyq zertteýler» JShS júrgizgen tarıhı-mádenı saraptama nysannyń tarıhı-mádenı qundylyǵyn joǵaltqany jáne ony budan bylaı tarıh pen mádenıet eskertkishi retinde saqtaý múmkin emestigi týraly qorytyndylardy rastady, — dep habarlady ákimdikten.
Qazirgi ýaqytta bul ýchaskede Egizbaev kóshesi, 9 mekenjaıynda ornalasqan 2500 oryndyq jańa mektepke baratyn joldyń qurylysy júrgizilip jatyr. Jumystardy osy jyldyń tamyz aıynda aıaqtaý josparlanǵan.
Eske salaıyq, buǵan deıin Jetisýda saq dáýiriniń qorǵandary zańsyz qazylyp, búlingenin jazǵanbyz.
