Almatyda kómir men qurylys qaldyqtaryna qatysty ekologııalyq baqylaý kúsheıtiledi
ALMATY. KAZINFORM – Almaty ákimdiginiń ekologııa máseleler jónindegi vedomstvoaralyq keńesinde qorshaǵan ortaǵa túsetin júktemeni azaıtýǵa baǵyttalǵan naqty sharalar toptamasy qaraldy.
Qala ákimdiginiń málimetinshe, qurylys salasy men kómirdi paıdalaný máselesine basa nazar aýdaryldy. Keńes barysynda qurylys qaldyqtaryn basqarýdy tártipke keltirý jáne ekologııalyq talaptardyń oryndalýyna baqylaýdy kúsheıtý mindeti qoıylǵan.
– Almaty oblysynda qurylys qaldyqtaryn jınaý men óńdeýge arnalǵan arnaıy ınfraqurylym qalyptastyrý josparlanyp otyr. Bul qadam qaldyqtardy retsiz tógýdiń aldyn alyp, qorshaǵan ortaǵa túsetin salmaqty azaıtýǵa múmkindik beredi, Sonymen qatar qurylys salasyn tolyq tsıfrlandyrý kózdelip otyr, bul ashyqtyqty arttyryp, baqylaý tetikterin tıimdi etedi, - dep habarlady ákimdikten.
Sonymen qatar qurylys alańdaryndaǵy ekologııalyq tártip te nazardan tys qalmady. Mindetti talaptardyń qatarynda – aýmaqtardy júıeli túrde sýarý jáne shańnyń paıda bolýyn azaıtatyn sharalardy qoldaný bar. Bul qurylys sektorynyń aýa lastanýyna qosatyn úlesin tómendetýge múmkindik bermek.
Qalada kómirdi paıdalaný máselesi de jeke qarastyryldy. Aýaǵa zııandy shyǵaryndylardy azaıtý maqsatynda kómirdiń qalaǵa jetkizilýin shekteý tetikteri talqylanyp jatyr. Sonyń ishinde kómirdi satý oryndaryn qala aýmaǵynan tys jerlerge kóshirý jáne ony paıdalanýdy qysqartý múmkindigi bar.
– Qabyldanǵan jáne qarastyrylyp jatqan sharalar aýanyń lastaný deńgeıin kezeń-kezeńimen tómendetýge, qalanyń ekologııalyq jaǵdaıyn jaqsartýǵa jáne Almatyda qaldyqtar men otyn resýrstaryn basqarýdyń tıimdi júıesin qalyptastyrýǵa baǵyttalǵan, - dep túsindirdi ákimdikten.
Eske salaıyq, qaladaǵy ekologııalyq jaǵdaıdy jaqsartý úshin Almaty ákimdigi tozyǵy jetken avtokólikterdi satyp alýdy josparlap otyr.
