Almatyda kommýnaldyq qyzmetter kúsheıtilgen rejımge aýysty

ALMATY. KAZINFORM – Qazgıdromettiń boljamyna sáıkes 14 naýryz kúni saǵat 16.00-den 15 naýryz kúngi saǵat 04.00-ge deıin Almatyda bıiktigi 8-10 sm qar aralas jaýyn-shashyn bolady dep kútilýde.

Almaty ákimdiginiń málimetinshe, qalada jaıly qozǵalysty qamtamasyz etý úshin kommýnaldyq qyzmetter táýlik boıy kúsheıtilgen rejımde jumys isteıdi.

«Qardyń túsýine, joldyń nashar kórinýi jáne joldaǵy kóktaıǵaqqa baılanysty avtokólik júrgizýshilerin jyldamdyqty azaıtýdy, birden tejegishti baspaýdy, araqashyqtyqty, búıirlik aralyqty jáne manevr jasaý erejelerin saqtaýdy suraımyz. Júrgizýshilerge aǵashtardyń qulaý qaýpi men elektr jelileriniń úzilýine baılanysty kólikterdi jol jıegine qoımaýǵa keńes beriledi. Jaıaý júrginshiler trotýarlarmen júrý kezinde abaı bolýy tıis, belgilengen jerlerde ǵana kóshelerdi kesip ótý kerek», - dep eskertti Almaty ákimdigi.

Aıta keteıik, Almatyda kúndizgi ýaqytta qar tazalaý jumysyna 463 birlik tehnıka, 18 motopompa men 1012 jol jumysshysy jumyldyryldy. 89 birlik arnaıy tehnıka men 320 jumysshynyń kúshimen kóldeneń aryq jelilerin tazartý jumystary aıaqtalýda. 14 naýryzda túngi ýaqytta syrtqa 320 m3 qar shyǵaryldy. Qysqy kezeńde barlyǵy 367,3 myń m3 qar shyǵaryldy.