Almatyda kommýnaldyq qyzmet kúsheıtilgen rejımde jumys istep jatyr
ALMATY. KAZINFORM — Almatyda qar tazalaý jumystary táýlik boıy júrgizilip jatyr.
Almatyda 24 aqpan saǵat 09:00–den qazirge deıin qalyń qar jaýyp jatyr. Búgin saǵat tańǵy 8:00-degi málimetke sáıkes, jaýǵan qardyń qalyńdyǵy 17 santımetrge jetti.
Kommýnaldyq ınfraqurylymdy damytý jáne turǵyn úı ınspektsııasy basqarmasynyń málimetinshe, kóktaıǵaqtyń aldyn alý jáne jol qaýipsizdigin qamtamasyz etý maqsatynda kóshelerge muzǵa qarsy materıaldar sebilip jatyr.
Qar tazalaý jumystaryna 75 jedel brıgada, 2710 jol qyzmetkeri jáne 1225 arnaıy tehnıka jumyldyrylǵan. Qalanyń magıstraldyq kóshelerinde 203 aralas jol tehnıkasy tartylǵan. Túngi saǵat 01:00–den bastap jol-patrýldik polıtsııanyń baqylaýymen 26 kolonna qardy jol jıegine ysyrý jumystaryna kirisken.
Saǵat túngi 2:00–den bastap 95 shaǵyn gabarıtti tehnıka trotýarlar men qoǵamdyq keńistikterdi mehanıkalandyrylǵan tásilmen tazalap jatyr. Sonymen qatar aıaldamalar, jerasty jáne jerústi ótkelderi, baspaldaqtar men pandýstardy jumysshylar tazalap jatyr.
— Qala kósheleri men joldardyń jaǵdaıyn baqylaý úshin táýlik boıy kezekshilik uıymdastyrylǵan. Qar tolyq toqtap, aýa raıy turaqtalǵanǵa deıin jumys úzdiksiz jalǵasady, — dep habarlady vedomstvodan.
Eske salaıyq, buǵan deıin eldegi qaı joldarda qozǵalys shektelgenin jazǵanbyz.