Almatyda kommýnaldyq qaryzy bar 600-den astam kásiporynnyń esepshoty buǵattaldy
ALMATY. KAZINFORM — «Almaty jylý júıesi» JShS zańdy tulǵalardan jylýmen jabdyqtaý jáne ystyq sýmen qamtamasyz etý qyzmetteri úshin bereshekti óndirip alý jumystaryn jalǵastyryp jatyr.
2026 jyldyń basynan beri debıtorlyq bereshekti óndirip alý bólimi qaryzy bar kásiporyndarǵa qatysty 1 274 materıaldy qarady. Onyń ishinde 602 atqarýshylyq is sot oryndaýshylaryna májbúrlep oryndatýǵa joldanǵan. Qalǵan materıaldar Qazaqstan Respýblıkasynyń zańnamasyna sáıkes zańdy kúshine ený satysynda.
— Bereshegi bar tulǵalarǵa qatysty májbúrlep oryndatýdyń keshendi sharalary qoldanylyp jatyr. Atap aıtqanda, olardyń bank shottaryna tyıym salynady, «E-notarıat» júıesi arqyly notarıattyq áreketter jasaýǵa shekteý qoıylady, sondaı-aq múlkine tyıym salynady. Budan bólek, qaryz somasy 40 AEK-ten asatyn 378 atqarýshylyq is boıynsha Qazaqstan Respýblıkasynan ýaqytsha shyǵýǵa shekteý engizilgen, — delingen habarlamada.
«Almaty jylý júıesi» JShS málimetinshe qabyldanyp jatqan sharalar nátıjesin berip jatyr. Atqarýshylyq is júrgizý satysyndaǵy 602 kásiporynnyń 283-i bereshegin tolyq ótegen.
Májbúrleý sharalary qyzmet aqysyn uzaq ýaqyt boıy tóleýden jaltaryp júrgen tutynýshylarǵa ǵana qoldanylady. Materıaldar óndirip alýǵa jiberilmes buryn kásiporyn tutynýshylarǵa habarlama berip, túsindirý jumystaryn júrgizedi jáne qaryzdy erikti túrde óteýge múmkindik usynady.
Kompanııa bereshegi bar tutynýshylarǵa qosymsha shyǵyndardan, shekteýlerden jáne zańnamada kózdelgen ózge de sharalardan saqtaný úshin qaryzdaryn ýaqytyly óteýdi eskertti.
Eske salaıyq, buǵan deıin Almatyda jáne oblysta qaryzy bar turǵyndaryń jaryǵy óshirile bastaǵanyn habarlaǵanbyz.
