Almatyda qoljetimdi orta talaptaryn saqtamaǵandarǵa 2 mln teńgeden astam aıyppul salyndy
ALMATY. KAZINFORM – 2026 jyldyń basynan beri Almatyda áleýmettik ınfraqurylymnyń 45 nysany tekserilip, qoljetimdi orta talaptaryn buzǵan alty sýbekti ákimshilik jaýapkershilikke tartyldy.
Qazaqstan Respýblıkasy Halyqty áleýmettik qorǵaý salasyndaǵy retteý jáne baqylaý komıtetiniń Almaty boıynsha departamentiniń basshysy Murat Muratbekovtiń málimetinshe, Almatyda múgedektigi bar 60 myńdaı adam turady. Olar úshin qoljetimdi orta qala ishinde óz betinshe qozǵalý, memlekettik jáne áleýmettik qyzmetterdi alý, jumys isteý, bilim alý jáne qoǵamdyq ómirge belsendi qatysý múmkindigin bildiredi.
Departament áleýmettik ınfraqurylym nysandarynda qoljetimdilik talaptarynyń saqtalýyna memlekettik baqylaý júrgizedi. Tekserýler josparly jáne jospardan tys tártippen ótkizilip, mamandar mindetti túrde nysandarǵa baryp tekseredi.
2026 jyldyń basynan beri áleýmettik ınfraqurylymnyń 45 nysanyna tekserý júrgizildi. Baqylaýshy organnyń nazarynda densaýlyq saqtaý, bilim berý, mádenıet, sport mekemeleri, memlekettik uıymdar, qyzmet kórsetý jáne kásipkerlik salasynyń nysandary boldy.
– Tekserý barysynda pandýstar men kótergish qurylǵylardyń bar-joǵyna, jaı-kúıine, kireberis aımaqtardyń qoljetimdiligine, sanıtarlyq-gıgıenalyq bólmelerdiń jabdyqtalýyna, qyzmetkerlerdi shaqyrý túımeleriniń, taktıldi kórsetkishterdiń, múgedektigi bar adamdarǵa arnalǵan avtoturaq oryndarynyń bolýyna, sondaı-aq kórý jáne estý qabileti buzylǵan adamdar úshin aqparattyń qoljetimdiligine erekshe nazar aýdaryldy, - dedi departamenti basshysy Óńirlik kommýnıkatsııalar qyzmetinde ótken brıfıng kezinde.
Tekserý nátıjesinde 32 nysanǵa anyqtalǵan zańbuzýshylyqtardy joıý týraly oryndaýǵa mindetti nusqamalar berildi. Taǵy alty sýbekt ákimshilik jaýapkershilikke tartyldy. Salynǵan aıyppuldardyń jalpy somasy – 2 mln 76 myń teńge.
Spıkerdiń aıtýynsha, Qazaqstan Respýblıkasynyń zańnamasynda múgedektigi bar adamdar úshin nysandardyń qoljetimdiligin qamtamasyz etý talaptaryn saqtamaǵany úshin ákimshilik jaýapkershilik kózdelgen. Aıyppul mólsheri quqyq buzýshynyń sanatyna qaraı 50-den 400 aılyq eseptik kórsetkishke deıin ózgeredi. Bir jyl ishinde zańbuzýshylyq qaıtalansa, aıyppul kólemi edáýir artady.
Eske salaıyq, buǵan deıin Astanada múgedektigi bar balalarǵa arnalǵan aralas áleýmettik qyzmet modeli engiziletinin habarlaǵanbyz.
