Almatyda kóliktiń ústine aǵash qulady
Almatynyń ortalyǵynda alyp aǵash avtokóliktiń ústine qulady, dep habarlaıdy QazAqparat tilshisi.
Onyń vıdeosy áleýmettik jelide tarap jatyr. Qalalyq Tótenshe jaǵdaılar departamentiniń málimetinshe, aǵash Jeltoqsan men Maqataev kósheleriniń qıylysynda qulaǵan.
«Almaly aýdanynda Jeltoqsan men Maqataev kóshesiniń qıylysynda alyp aǵash «Honda CR-V» kóliginiń ústine qulaǵan. Bir kósheniń qozǵalysyn tejep qalǵan aǵashty joldan alyp tastaýǵa qala ákimdiginiń «109» qutqarý qyzmetkerleri jumyldyryldy. Qurbandar men zardap shekkender joq», - dep habarlady departamentten.
Buǵan deıin Almaty turǵyndaryna qatty jańbyr men jelge baılanysty eskertý jarııalanǵan bolatyn.
«22 qyrkúıekte kúndiz Almatyda qatty jaýyn-shashyn kútiledi. Osyǵan baılanysty, kólik júrgizýshileri jyldamdyqty tómendetip, avarııalyq shamdardy qosyńyz nemese nóserdiń toqtaǵanyn kútińiz»,- delingen habarlamada.
