Almatyda kólikten shyǵatyn gazdyń sapasyn taldaıtyn spektrometrler ornatyldy

ALMATY. KAZINFORM - Ekologııa jáne qorshaǵan orta basqarmasy Almaty qalasynyń mamandandyrylǵan tabıǵat qorǵaý prokýratýrasymen jáne Almatyda tsıfrlyq tehnologııalardy engizý jónindegi kompanııamen birlesip, pılottyq rejıminde kólik quraldarynan shyǵatyn gazdaǵy zattardy ólsheý jáne taldaý úshin spektrometrler ornatty. 

Spektrometrler joldyń qarama-qarsy jaqtaryna tar ýchaskelerde ornatylady jáne onyń jumysy úshin kólik quralyn toqtatýdyń qajeti joq. Naqty ýaqyt rejıminde (jaryq sáýleleriniń kómegimen) ótip bara jatqan kólikterdiń shyǵaryndylary týraly derekterdi jınaıdy. Protsess avtomattandyrylǵan, adam jumysyn qajet etpeıdi.

- Spektrometrler kómirqyshqyl gazy, kómirtek oksıdi, azot oksıdteri, kómirsýtekter jáne ammıak sııaqty zattardyń kontsentratsııasyn anyqtaı alady jáne optıkalyq tyǵyzdyq arqyly dızeldi kólikterdiń tútinin baǵalaıdy. Qazirgi ýaqytta joba Almaty avtoparki shyǵaryndylarynyń ortasha mánderin anyqtaýǵa baǵyttalǵan. Bolashaqta Sergek beınebaqylaý júıesimen ıntegratsııalaý kezinde bul tehnologııa avtomobılderdiń shyǵaryndylardyń ruqsat etilgen normalarynan asatyn memlekettik nómirlerin avtomatty túrde anyqtaýǵa múmkindik beredi, - dep habarlady ákimdikten.

Ázirleýshilerdiń aıtýynsha, bul ınnovatsııalyq joba aýa sapasynyń monıtorıngin jaqsartýǵa jáne qalalyq jaǵdaıda paıdalanylatyn avtomobılder úshin ekologııalyq standarttardyń saqtalýyna yqpal etýge arnalǵan. Buǵan uqsas júıeler kóptegen memlekette tıimdi jumys isteıdi. Mysaly, EDAR jáne Opus tehnologııalary Madrıd, Venetsııa, Berlın, Frankfýrt, London, Brıýssel, Parıj jáne basqa da iri qalalarda sátti engizilgen. 

Eske salaıyq, Almatyda elektromobıl júrgizýshileri avtoturaqty tegin paıdalana alady.