Almatyda kólik qaǵyp ketken jaıaý júrginshilerdiń jaǵdaıy qalaı
ALMATY. KAZINFORM — Almaty qoǵamdyq densaýlyq saqtaý basqarmasy Medeý aýdanynda bolǵan jol apaty saldarynan zardap shekkenderdiń jaǵdaıy týraly málimet taratty.
Vedomstvonyń habaryna qaraǵanda, Ortalyq qalalyq klınıkalyq aýrýhanaǵa alty adam jetkizilgen.
Dárigerler júrgizgen tekserýlerden keıin tórt zardap shegýshiniń aıaq-qoldary synǵany anyqtalǵan. Al eki adam túrli dene jaraqatyn alyp, jumsaq tinderi zaqymdanǵan.
Zardap shekkenderdiń bireýi ota jasaý úshin aýrýhanaǵa jatqyzyldy. Qalǵandaryna qajetti medıtsınalyq kómek kórsetilip, tekserýden keıin tirkelgen emhanalary boıynsha ambýlatorııalyq em qabyldaýǵa jiberildi.
Eske salaıyq, 9 maýsym kúni tańerteń Audi kóliginiń júrgizýshisi Zenkov kóshesimen kele jatyp, bes jaıaý júrginshini qaǵyp ketken.
Odan keıin kólik jol jıeginde turǵan Toyota avtokóligimen soqtyǵysqan. Soqqynyń áserinen Toyota taǵy bir turaqta turǵan Subaru kóligine soǵylǵan. Oqıǵanyń mán-jaıy anyqtalyp jatyr.
