Almatyda kólik ınfraqurylymy úshin 18 jer telimi memleket menshigine alynady
ALMATY. KAZINFORM – Almaty qalasynyń ákimdigi memleket muqtajy úshin 18 jer ýchaskesin ıelikten shyǵarý týraly birqatar qaýly qabyldady.
Qujattarǵa sáıkes, bul jer telimderi avtoturaq, avtobýs aınalatyn alań jáne avtobýs parkiniń qurylysyn salý maqsatynda alynady. Onyń ishinde Naýryzbaı aýdany, «Quramys» shaǵyn aýdanyndaǵy Aqseleý Seıdimbek kóshesi boıynda ornalasqan 0,0641 jáne 0,0740 gektar bolatyn eki jer telimi bar. Olardyń ornyna áleýmettik nysandarǵa arnalǵan avtoturaq alańynyń qurylysy josparlanǵan. Atalǵan jer telimderi boıynsha ıelikten shyǵarý rásimin aıaqtaý 2028 jyldyń sońyna deıin josparlanyp otyr.
Kelesi qaýlyda Naýryzbaı aýdanynda ornalasqan 15 jer telimin májbúrlep ıelikten shyǵarý bekitildi. Bul ýchaskeler Abaı dańǵylynyń soltústiginde jáne Medeýbekov kóshesiniń shyǵysynda ornalasqan. Onda qalanyń qoǵamdyq kólikteri aınalatyn alań salynady. Rásimderdi 2028 jyldyń sońyna deıin aıaqtaý josparlanǵan.
Sonymen qatar ákimdik qaýlysymen 2024 jylǵy 21 qazanda qabyldanǵan burynǵy sheshimge ózgerister engizildi. Onda Medeý aýdany Kulja trassasynda ornalasqan, aýdany 6,35 gektar bolatyn jer ýchaskesi ıelikten shyǵarylatyny naqtylanǵan. Bul jerde jańa avtobýs parkiniń qurylysy josparlanyp otyr. Májbúrlep ıelikten 2026 jyldyń 31 jeltoqsanyna deıin oryndalýy tıis.
Alynǵan barlyq jer telimderi Almaty qalasynyń jol ınfraqurylymyn damytý basqarmasynyń qaramaǵyna beriledi. Menshik ıeleri ótemaqyny Qazaqstan Respýblıkasynyń Jer kodeksi men «Memlekettik múlik týraly» zań talaptaryna sáıkes alady.
Eske salaıyq, buǵan deıin Almatyda eki kósheni uzartý úshin 34 jer telimi májbúrli túrde memleket menshigine alynatynyn jazǵanbyz.