Almatyda Kólik ǵylymdary men tehnologııalary ınstıtýty qurylady
ALMATY. KAZINFORM – Ulttyq ǵylym akademııasynyń basqarýymen Almatyda alǵashqy Kólik ǵylymdary men tehnologııalary ınstıtýty qurylady.
Ulttyq ǵylym akademııasynyń málimetinshe, Almaty qalasynda M.Tynyshpaev atyndaǵy ALT ýnıversıtetiniń bazasynda elimizdegi alǵashqy Kólik ǵylymdary men tehnologııalary ınstıtýtyn qurý týraly memorandýmǵa qol qoıyldy.
Instıtýt Memleket basshysy Qasym-Jomart Toqaevtyń kólik, logıstıka jáne tranzıt salalaryn damytýǵa qatysty strategııalyq tapsyrmalaryn iske asyrý aıasynda qurylǵan.
– Kólik ǵylymdary men tehnologııalary ınstıtýty kólik salasyndaǵy irgeli jáne qoldanbaly ǵylymı zertteýlerdi júzege asyratyn mamandandyrylǵan ǵylymı ortalyq retinde jumys isteıtin bolady, - dep habarlady akademııadan.
Instıtýt qyzmetiniń negizgi baǵyttaryna kólik júıesin damytýǵa arnalǵan ǵylymı-tehnıkalyq negizdemelerdi ázirleý, tranzıt pen logıstıkanyń tıimdiligin arttyrý, kólik ınfraqurylymynyń beriktigi men uzaq merzimdiligin qamtamasyz etý, ınnovatsııalyq materıaldar men tehnologııalardy engizý, sondaı-aq kólik nysandaryn ártúrli jol-klımattyq jaǵdaılarǵa beıimdeý kiredi.
Sonymen qatar ınstıtýttyń mańyzdy ǵylymı baǵyttarynyń biri – Qazaqstan aýmaǵynyń jol-klımattyq aýdandastyrylýyn naqtylaý. Qazirgi tańda el aýmaǵy eki ǵana jol-klımattyq aımaqqa bólingen. Josparlanǵan ǵylymı zertteýler nátıjesinde óńirlik erekshelikterdi eskeretin neǵurlym naqty júıe qalyptastyrylyp, aımaqtar sany altyǵa deıin ulǵaıtylmaq.
– Memleket basshysy kólik pen logıstıkany eldiń strategııalyq basymdyǵy retinde aıqyndady. Osy mindetterdi tabysty iske asyrý úshin salany zamanaýı ǵylymmen qamtamasyz etý qajet. Kólik ǵylymdary men tehnologııalary ınstıtýty dál osy maqsatqa qyzmet etedi, - dedi Ulttyq ǵylym akademııasynyń prezıdenti Aqylbek Kúrishbaev.
Onyń aıtýynsha, Ulttyq ǵylym akademııasynda «Kólik» baǵyty boıynsha arnaıy ǵylymı sektsııa qurylyp, bul baǵyt alǵash ret ǵylymnyń basym baǵyttarynyń tizbesine engizilgen. Nátıjesinde kólik salasyndaǵy ǵylymı jobalar granttyq jáne baǵdarlamalyq-maqsatty qarjylandyrýǵa, sondaı-aq kommertsııalandyrý tetikterine qol jetkizdi.
Instıtýt qyzmetinde jasandy ıntellekt, geoaqparattyq júıeler jáne boljamdyq modeldeý tehnologııalaryn qoldaný kózdelip otyr.
Eske salaıyq, elimiz úshin kólik-logıstıka salasynyń áleýetin arttyrý – strategııalyq mańyzy bar mindet. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.