Almatyda kóligimen kúzetshini birneshe ret basyp ótken er adam ustaldy
ALMATY. KAZINFORM - Almatyda «djıp» kóligin mingen júrgizýshi turǵyn úıdiń kúzetshisin birneshe ret basyp qana qoımaı, ony birenshe uryp-soqqan.
Túngi ýaqytta bolǵan oqıǵanyń vıdeosy áleýmettik jelige shyqty. Vıdedaǵy jazbada oqıǵa «Merkýr Taýn» elıtalyq turǵyn úı kesheninde bolǵany, saldarynan kúzetshiniń aýrýhanada kóz jumǵany jazylǵan.
Almaty qalalyq polıtsııa departamenti kisi óltirý deregi boıynsha qylmystyq is qozǵalǵanyn habarlady.
«Aldyn ala málimet boıynsha, turǵyn úı kesheniniń kúzetshisi men turǵyny arasynda janjal shyǵyp, nátıjesinde 45 jastaǵy er adam kúzetshige ómir súrýge sáıkes kelmeıtin dene jaraqattaryn salǵan. Kúdikti ýaqytsha ustaý ızolıatoryna qamaldy. Qylmystyń basqa da mán-jaılary anyqtalýda», - dep jazdy Almaty qalalyq polıtsııa departamentiniń baspasóz qyzmeti.
