Almatyda qolaısyz aýa raıyna baılanysty qoǵamdyq kólik sany kóbeıedi
ALMATY. KAZINFORM — Almaty máslıhaty qala turǵyndary men qonaqtaryna kóktaıǵaqqa baılanysty úndeý jasady.
«Qazgıdromet» málimetinshe, 4 qarasha kúni Almatyda jańbyr jaýyp, keıin temperatýra tómendeıdi. Al 5 qarashada keı jerde qar jaýyp, kóktaıǵaq bolady. Túnde aýa temperatýrasy −3…−5 gradýsqa deıin tómendeıdi.
Osyǵan baılanysty bılik ókilderi turǵyndarǵa jeke avtokólikpen emes, qoǵamdyq kólikpen qatynaýǵa, ásirese tańerteń jáne keshki ýaqytta jolǵa shyqpaýǵa keńes berdi.
— Qalada avtobýs pen trolleıbýs sany kóbeıedi, — delingen Almaty máslıhaty taratqan habarlamada.
Sonymen qatar qar tazalaý jumystarynyń ýaqtyly júrýi úshin júrgizýshiler kólikterin jol jıegine qoımaǵany jón.
Búgin, 2025 jylǵy 4 qazanda Almaty taýlarynda qar jaýdy.
Aq ulpany «Shymbulaq» taý-shańǵy kýrortynyń kameralary túsirip alǵan.
Eske salaıyq, buǵan deıin Almatyda aýa raıynyń kúrt buzylýyna baılanysty kommýnaldyq qyzmetter táýlik boıy jumys isteý rejımine aýysqanyn habarlaǵan edik.
«Almaty Tazalyq» kásiporyndarynyń bazalarynda júrgizýshiler, mehanızatorlar men jumysshylar táýlik boıy kezekshilik atqarady. Qar túspeı turyp, magıstraldyq kóshelerge aldyn ala suıyq reagentter sebiledi.