Almatyda qol sómkesinen granata tabylǵan er adam ustaldy
ASTANA. KAZINFORM — Almaty qalasynda Raıymbek dańǵylynda polıtsııa qyzmetkerleri kúmándi áreket jasaǵan er adamdy ustady. Bul týraly Almaty qalasynyń Polıtsııa departamenti málim etti.
Tekserý barysynda onyń qol sómkesinen pyshaq jáne syrtqy pishini granataǵa uqsas zat tabylǵan. Oqıǵa ornyna jedel-tergeý toby men saper mamandar shaqyryldy.
— Tekserý nátıjesinde tárkilengen zattyń oqý-jattyǵý granatasy ekeni jáne eshqandaı qaýip tóndirmeıtini anyqtaldy. Ustalǵan azamattyń aıtýynsha, ol bul zattardy buryn taýyp alǵan, al pyshaqty turmystyq qajettilik úshin ózimen birge alyp júrgen. Qazirgi ýaqytta bul málimetterdiń ras-ótirigi tekserilip jatyr, — delingen habarlamada.
Sondaı-aq er adamnyń buǵan deıin qylmystyq jaýapkershilikke tartylǵany belgili boldy.
Almaty polıtsııasy turǵyndardy ózderimen birge qaýip tóndirýi múmkin zattardy alyp júrmeýge shaqyryp, qarý-jaraqqa nemese oq-dárige uqsas zattardy baıqasa, dereý «102» nómirine habarlaýdy surady.
