Almatyda kókjótel juqtyrǵandardyń deni vaktsına saldyrmaǵan

ALMATY. KAZINFORM – Almatyda kókjótel juqtyrǵandar kóbeıdi. Byltyr 5 jaǵdaı tirkelse, bıyl bes aıdyń ózinde 62 balaǵa kókjótel tıgen. Olardyń basym bóligi – 14 jasqa tolmaǵandar.

«Onyń 35-i (56,4%) kókjótelge qarsy ekpeden bas tartýyna, 14-i (22,5%) medıtsınalyq qarsy kórsetilimderge baılanysty vaktsına qabyldamaǵan. 16 paıyzǵa jýyǵy – ekpe jasyna jetpegen bala. Oshaqtarda baılanysta bolǵan 334 adam tekserildi, nátıjeleri – teris. Baılanysta bolǵandarǵa emhanalardyń medıtsına qyzmetkerleriniń medıtsınalyq baqylaýynda»,- Almaty qalasynyń sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova.

Mamanyń aıtýynsha, alǵashynda naýqasta qarapaıym sýyq tııýdiń belgileri bolady. Keıin jótel dendep, balanyń dene qyzýy kóteriledi. Onyń aldyn alý joly – ýaqytynda ekpe egý.

Jalpy nárestege 2, 3, 4, 18 aı bolǵanda vaktsına saldyrýǵa bolady. 

«Kókjótelden qorǵaýdyń jalǵyz senimdi jáne tıimdi ádisi – vaktsınatsııa. Kókjótelge qarsy egý 2, 3, 4 jáne 18 aılyq jastaǵy balalarǵa kókjótelge, dıfterııaǵa, sirespege, «V» gepatıtine, gemofıldi ınfektsııaǵa jáne polıomıelıtke qarsy bir mezgilde keshendi vaktsınamen júrgiziledi. Budan ári 6 jastaǵy balalar AbKDS kúsheıtkish dozasymen egiledi», - dedi ol.