Almatyda kóktemgi jol jóndeý jumystary qashan bastalady

ALMATY. KAZINFORM – Almaty ákimi Erbolat Dosaev Jetisý aýdanynyń turǵyndarymen kezdesý kezinde qaladaǵy joldardy jóndeý jumystary qashan bastalatynyn aıtty.

«Qurmetti turǵyndar, sizder jol máselesin qozǵadyńyzdar. Birden jaýap bereıin, qys bitken soń bizde ádettegideı shuńqyrlar, tesikter, lıýkter jáne basqa da jumystar shyǵa bastaıdy. Ókinishke qaraı, qalanyń búgingi ınfraqurylymy uzaq jyldar boıy saqtaldy, biraq modernızatsııadan ótpegen. Biz bul jumystardy bastadyq», - dedi qala ákimi.

Erbolat Dosaevtyń aıtýynsha, Jetisý aýdany eski aýdannyń biri sanalady.

«Aýdanda barlyq ınfraqurylym tozǵan. Onyń ishinde sý qubyry, káriz bar, keıbir jerlerde ol da joq. Sondyqtan qalanyń jospary boıynsha men qosymsha qarajat bóldim. Qar erigen soń biz asfalt-beton zaýytyn merziminen buryn iske qostyq, ol aqyryndap jumys isteı bastady. Aldaǵy ýaqytta jobalyq qýatyna jetetin bolady. Bul jerge de qatysty, dymqyl jerge asfalt tóseý paıda bermeıdi, sebebi, belgili ýaqyt ótken soń toz-tozy shyǵady. Sosyn sizder bizge eki ese shaǵym aıtasyzdar. Sondyqtan bizge múmkindik berińizder, sáýir aıynda sizdermen birge sanıtarlyq tazalyq, abattandyrý jumystaryn júrgizemiz. Al, aýa temperatýrasy qalypqa kelgen kezde sizderdiń ótinish-tilekterińizdi oryndaımyz», - dedi ol.

Qala ákimi qazir aýdandyq ákimdikte qarjylyq múmkindik bar ekenin, qajetti qarajat qarastyrylǵanyn atap ótti. Bıyl Jetisý aýdanynda jóndeý jumystaryna 500 mln teńge bólindi. Sonymen qatar ár aýdanǵa usaq jóndeý jumystaryna 100 mln teńgeden jumsalady. 

«Aýdan ákimdigi sizderdiń aldaryńyzdaǵy mindettemelerin jóndeýge ári tolyq oryndaýǵa múmkindigi bolady», - dedi Erbolat Dosaev.

Eske salsaq, buǵan deıin Almaty ákimdigi jol jóndeýde qatelikter jibergen merdigermen kelisimshartty buzǵan bolatyn.