Almatyda kóktem birqalypty jyly bolady – Qazgıdromet
ALMATY. KAZINFORM – Almaty men oblysta bıylǵy kóktem birqalypty jyly bolady. Maýsymnyń birinshi jartysynda birese jyly, birese salqyndaý bolyp, jaýyn-shashynnyń mólsheri edáýir artady.
«Qazgıdromet» RMK Almaty men Almaty oblysyndaǵy bólimshesiniń meteorologııalyq boljamdar bóliminiń basshysy Dáýlet Kisebaev aldaǵy ýaqytqa osyndaı boljam usyndy.
Onyń aıtýynsha, kún raıy ótpeli maýsymǵa tán sıpatta bolady. Naýryz aıynda óńir boıynsha ortasha aýa temperatýrasy klımattyq normaǵa jýyq, Almaty oblysynyń soltústik-batysynda bir gradýsqa joǵary bolady dep boljanyp otyr. Sáýirde oblys aýmaǵynyń basym bóliginde temperatýra normadan bir gradýsqa joǵary bolyp, taý bókteri men taýly aýdandarda qalypty shekte saqtalady. Mamyr aıynda temperatýralyq fon turaqtanyp, búkil oblys boıynsha klımattyq normaǵa sáıkes bolady.
– Kóktemde jylda kún osylaı qubylyp turady. Bıyl da solaı bolady. Kún jylyp, qaıta salqyndap turady. Alaıda asa bir kún qatty sýyp, qatty ysyp ketetindeı jaǵdaı bola qoımaıdy. Bul kóktemge tán qalypty jaǵdaı, oǵan qalalyq qyzmetter jaqsy daıyndalǵan, – dedi Dáýlet Kisebaev Óńirlik kommýnıkatsııalar qyzmetindegi kóktemgi sý tasqyny kezeńine daıyndyqqa arnalǵan baspasóz konferentsııasynda.
Ol Almaty boıynsha jeke boljam da usyndy. Naýryz aıynda temperatýra aıtarlyqtaı aýytqýy múmkin: aıdyń birinshi onkúndiginde túngi temperatýra −5…−10 gradýsqa deıin tómendeýi yqtımal, ekinshi onkúndikte kúndiz +23 gradýsqa deıin jylynady, aı sońynda az ýaqytqa salqyndaýy múmkin. Sáýir men mamyrda ortasha aýa temperatýrasy birtindep joǵarylaıdy.
Naýryz ben sáýir aıynda Almatyda jaýyn-shashynnyń mólsheri ádettegiden kóp bolady degen boljam bar. Naýryzda klımattyq norma 72 mm bolsa, ásirese aıdyń birinshi jáne úshinshi onkúndiginde jańbyr men qar aralas jaýyn-shashyn jıi jaýady. Sáýirde norma 112 mm bolǵanymen, jaýyn-shashyn mólsheri kóp bolýy yqtımal. Mamyrda jaýyn-shashyn kólemi ortasha kópjyldyq kórsetkishterge sáıkes, shamamen 99 mm deńgeıinde bolady.
– Sáýir men mamyr Almatyda eń jańbyrly aı sanalady. Bul ýaqytta jaýyn-shashynnyń kóbeıýi bir tótenshe jaǵdaı emes, óńirdiń klımattyq ereksheligi sondaı ózi. Biz boljamdy keńes berý sıpatynda jasap, jańa derekterge qaraı ony naqtylap otyramyz únemi, - dedi Dáýlet Kisebaev.
Sınoptıkterdiń baǵalaýynsha, bıylǵy kóktem Almatyda jáne Almaty oblysynda ádettegideı qalypty ótpek.
Eske salaıyq, buǵan deıin sınoptıkter aldaǵy kúnderi eldiń soltústiginde kún sýyp, ońtústikte jylynatynyn boljaǵan edi.