Almatyda qoqys shyǵarý tarıfi qaıta qaraldy
ALMATY. KAZINFORM – 2026 jylǵy 28 maýsymnan bastap Almatyda qatty turmystyq qaldyqtardy (QTQ) jınaý, tasymaldaý, suryptaý jáne kómý qyzmetteriniń jańa tarıfi kúshine enedi.
Tıisti sheshim buǵan deıin qalalyq máslıhattyń XLVI kezekti sessııasynda qabyldanǵan edi.
Tarıftiń ózgerýi qosylǵan qun salyǵynyń mólsherlemesiniń 16%-ǵa deıin ósýine baılanysty.
Endi abattandyrylǵan jáne abattandyrylmaǵan sektorlarda turatyn turǵyndar úshin bir adamǵa shaqqandaǵy aı saıynǵy tólem 744,1 teńgege deıin ósedi. Buǵan deıin ol 718,5 teńge bolǵan.
Sondaı-aq QTQ-nyń bir tekshe metrin shyǵarý tarıfi 3 303,9 teńgeden 3 832,5 teńgege deıin ósti. Bul somaǵa qaldyqtardy jınaý, tasymaldaý, suryptaý jáne kómý qyzmetteriniń tolyq tsıkli kiredi.
Sonymen qatar azamattardyń jekelegen sanattary úshin jeńildikter júıesi saqtaldy. Uly Otan soǵysynyń ardagerleri qoqys shyǵarý qyzmeti úshin tólemnen tolyq bosatylady.
Al UOS ardagerlerine teńestirilgen azamattarǵa, I toptaǵy múgedektigi bar adamdarǵa, bala kezinen múgedektigi bar azamattarǵa, múgedektigi bar balalardyń ata-analaryna nemese zańdy ókilderine, sondaı-aq jetim balalarǵa 50% jeńildik qarastyrylǵan.
II toptaǵy múgedektigi bar adamdarǵa jáne áleýmettik jaǵynan osal toptardyń ózge de ókilderine 25% jeńildik beriledi.
Jeńildikter tutynýshy ótinish bergen kúnnen bastap jáne ony rastaıtyn qujattardy usynǵan jaǵdaıda qoldanylady.
Eske salaıyq, buǵan deıin Astanada elektr jaryǵynyń tarıfi ózgerýi múmkin ekenin jazǵanbyz.
