Almatyda qoǵamdyq orynda balaǵattaǵan sheteldik 10 kúnge qamaldy
ALMATY. KAZINFORM – Almatyda qoǵamdyq orynda balaǵat sózder aıtyp, beınejazba jarııalaǵan sheteldik jazalandy.
Beınejazbadaǵy áıel Qazaqstandaǵy bank pen HQKO jumysyna shaǵymyn beıádep sózdermen jetkizedi. Sondaı-aq munda ózine “Reseıdegi ózbekterge sekildi” nashar qaraıtynyn aıtady. Bul málimdeme qazaqstandyqtar arasynda úlken narazylyq týdyrdy.
Almaty qalasynyń polıtsııa departamenti atalǵan derek boıynsha Almaly aýdanynyń polıtsııa basqarmasy tekserý júrgizgenin habarlady.
- Sheteldik azamattyń qoǵamdyq orynda dóreki túrde beıádep sózder aıtqany anyqtaldy. Ol osy áreketimen qoǵamdyq tártipti jáne Qazaqstan Respýblıkasy zańnamasynyń talaptaryn buzǵan. Usaq buzaqylyq deregi boıynsha ákimshilik is qozǵalyp, materıaldar qaraý jáne protsessýaldyq sheshim qabyldaý úshin sotqa joldandy. Almaty qalasynyń mamandandyrylǵan aýdanaralyq ákimshilik sotynyń sheshimimen quqyq buzýshy 10 táýlik merzimge ákimshilik qamaýǵa alyndy, - dep habarlady departamentten.
Eske salaıyq, Almatyda bıyl 4 myńnan astam sheteldik jaýapqa tartyldy.
