Almatyda qoǵamdyq kóliktiń quny nege kóterildi – depýtat jaýaby

ALMATY. KAZINFORM – Almatyda qalalyq Máslıhattyń kezekten tys XXI sessııasy kezinde qaladaǵy qoǵamdyq kóliktiń qunyn 120 teńgege kóterý sheshimi qabyldady.

Almaty qalasy Máslıhatynyń depýtaty, Qurylys, sáýlet, ýrbanıstıka jáne jer qatynastary jónindegi turaqty komıssııasynyń tóraǵasy Nursultan Shoqanov bul ózgeristiń sebebin túsindirdi.

— Bizde sýbsıdııa rekordtyq kórsetkishke jetip otyr. Bıyl tasymaldaýshy kompanııalarǵa bólinip otyrǵan 97 mlrd teńge Qyzylorda, Taldyqorǵan syndy oblystyq mańyzy bar qalalardyń bıýjetimen birdeı. Tarıf pen sýbsıdııa mundaı baǵytta júre beretin bolsa, basqarýǵa kelmeıtin protsessterge alyp kelýi múmkin. Sondyqtan biz tarıf baǵasyn birtindep kóterip otyrýdan eshqaıda kete almaımyz. Birinshiden, jergilikti bıýdjetke túsetin júktemeni azaıtýymyz kerek. Biraq bul shaǵyn ósim halyqtyń áleýmettik osal toptaryna áser etpeıdi. Búgingi deıin kim tegin júrse, olar ári qaraı da tegin júre beredi, kimniń 50% jeńildigi bolsa, bul jeńildik olarda qalady. Jolaqynyń quny qalanyń barlyq bóliginde, barlyq marshrýttarǵa birdeı. Adam 70 shaqyrym júrip ótse de, osy 120 teńgeni tóleıtin bolady. Aılyq jol júrý aqysy 7200 teńgeden 9900 teńgege kóterildi, — dedi ol.

Máslıhat depýtaty qolma-qol tólem jasaý múmkindigi nege alynyp tastalǵanyn da túsindirdi. Onyń aıtýynsha, tólemniń qolma-qol aqshasyz jasalýy — júrgizýshilerdiń jumysyn jeńildetedi, olardy alańdatatyn sebepterdi azaıtady. Oǵan qosa, tóleý júıesiniń ashyqtyǵyn qamtamasyz etip, bolashaqta sýbsıdııa kólemin azaıtýǵa múmkindik beredi.

Sondaı-aq Nursultan Shoqanov «jolaqy aldaǵy jyldary taǵy da qymbattaýy múmkin be» degen suraqqa naqty jaýap bermese de, tarıfterdiń kóterilýin qoldaıtynyn aıtty.

— Meniń pikirimshe, tarıfterdi kóterý qajet. Búgin ózge de depýtattar osyǵan uqsas oılaryn ortaǵa saldy. Óıtkeni kómekti shynymen qajet etetin adamdardyń tobyna ǵana sýbsıdııa jasalýy kerek. Olar: zeınetkerler, stýdentter, kópbalaly analar, — dedi depýtat.