Almatyda qoǵamdyq kóliktiń 23 baǵyty áleýmettik mańyzdy dep tanyldy
ALMATY. KAZINFORM – Almatyda oblys pen qala arasynda qatynaıtyn qoǵamdyq kólikter jetispeıdi. Bul týraly Almaty máslıhattyń kezekten tys XXVII sessııasy barysynda mobıldilik basqarmasynyń basshysy Saǵyndyq Telibaev málim etti.
Saǵyndyq Telibaevtyń sózinshe, qala mańyndaǵy turǵyndardyń basym bóligi qoǵamdyq kóliktiń jetispeýshiligi problemasyna tap bolyp otyr.Sondyqtan olar jeke tasymaldaý qyzmetterin paıdalanýǵa májbúr.
– Kún saıyn qala aýmaǵyna 300 myńnan astam kólik keledi. Qala aýmaǵyna kiretin kólik quraldarynyń joǵary aǵynyn qysqartý jáne qala turǵyndarynyń mobıldiligin arttyrý maqsatynda Almaty ákimdigi 147 qalalyq jáne 54 qala mańyndaǵy marshrýttardy uıymdastyrdy. Onyń ishinde áleýmettik mańyzy bar qatynastar tizbesine tek 178 marshrýt engizilgen. Halyq úshin qalǵan 23 marshrýttyń qoljetimdiligin qamtamasyz etý maqsatynda olardy áleýmettik mańyzy bar qatynastar tizbesine engizý qajet, - dep atap ótti basqarma basshysy.
Otyrys qorytyndysy boıynsha depýtattar bul usynysty qoldady.
Eske salaıyq, byltyr Almatyda qala mańyna qatynaıtyn 8 jańa avtobýs baǵyty ashylǵan bolatyn.
Buǵan deıin, bıyl Almatyda ákimdik jáne jeke tasymaldaýshylar 800 gaz avtobýsy men 260 elektrobýs satyp alatyny týraly jazǵan edik.