Almatyda qoǵamdyq kólikte jol júrý aqysy kóterilip, qolma-qol tólem alyp tastaldy
ALMATY. KAZINFORM – Almaty máslıhatynyń kezekten tys XXI sessııasy barysynda depýtattar qalanyń qoǵamdyq kóliginde jol júrýge qatysty 120 teńgege jańa tarıfti maquldady.
Almatyda 22 jeke jáne 1 kommýnaldyq avtobýs parki jumys isteıdi. Kún saıyn jelide shamamen 2,3 myń avtobýs pen 184 trolleıbýs júredi. Qoǵamdyq kóliktermen jol júretin jolaýshylar sany kúnine 1,5 mıllıon adamnan asty.
Qalalyq mobıldilik basqarmasynyń basshysy Saǵyndyq Telibaev 2023 jylǵy tamyzda jol júrý tarıfi 11 jylda alǵash ret 100 teńgege deıin kóterilgenin eske saldy.
Osyǵan qaramastan sýbsıdııa kólemi 20%-ǵa ósti. Sebebi búgingi shynaıy tarıf 310 teńge, al keıbir marshrýtta 400 teńgege jetedi. Osy somamen qoldanystaǵy tarıf aıyrmashylyǵyn ákimdik osy kúnge deıin jaýyp keledi. Biraq qala bıýjetine júktemeni azaıtý qajettiligi bar.
«Jolaýshylar úshin qoǵamdyq kólikte jol júrý quny 20 teńgege artyp, qolma-qol aqshasyz tólem – 120 teńge bolyp bekitildi. Bul sheshim sýbsıdııa kólemin 7 mlrd teńgege tómendetýge múmkindik beredi», - dedi Almaty ákiminiń orynbasary Asqar Ámrın.
Al, qolma-qol tólem - 200 teńge alynyp tastaldy.
«Jyl saıyn avtobýstarǵa, qosalqy bólshekterge jáne ózge de shuǵyl shyǵystarǵa baǵanyń ósýi tirkelýde. Qosalqy bólshekterdi ýaqtyly satyp alý múmkin emes, al bul jolaýshylar tasymalynyń sapasyna teris áser etýde. Sonyń saldarynan qala turǵyndary ádil shaǵymdar jasaıdy. Ákimdik pen jeke tasymaldaýshylar jyljymaly quramdy únemi jańartyp otyrý jáne jumys istep turǵan avtoparkti sapaly kútip ustaý úshin orasan zor qarajat bólýge májbúr», - dedi Saǵyndyq Telibaev.
Almaty ákimdigi 2023 jyly 600 gazben júretin avtobýs, 100 trolleıbýs satyp aldy. Sonymen qatar, jeke tasymaldaýshylar 2023 jyly 550 avtobýs jetkizdi. Bıyl taǵy sonsha avtobýs,112 trolleıbýs jáne100 elektravtobýs satyp alý josparda. Qabyldanǵan sharalar 2024 jyly ekologııalyq taza kóliktiń úlesin 70% - ǵa deıin arttyrýǵa múmkindik bermek. Qoǵamdyq kólikterdiń ortasha qoldaný merzimi-3 jyl.
Eske salaıyq, shilde aıynyń basynda qoǵamdyq kólik jolaqysyn 120 teńgege kóterý týraly qala ákimdiginiń qaýly jobasy «Ashyq NQA» saıtynda jarııalanǵan edi.
Sondaı-aq Almaty avtoparkteri jolaqyny 20 teńgege kóterýge qarsy shyǵyp, kem degende 180 teńge bolýyn talap etken bolatyn.
