Almatyda qoǵamdyq kólikke arnalǵan arnaıy jolaqtar kóbeıedi
ALMATY. KAZINFORM – Almatyda avtobýs jolaqtary men velojoldar jelisin damytý jospary daıyndaldy.
Ákimdiktiń málimetinshe, qazirgi tańda buslane jolaqtarynyń jalpy uzyndyǵy – 84 shaqyrym. Qosymsha taǵy 56 shaqyrym arnaıy jolaq uıymdastyrý josparlanǵan. Sonyń nátıjesinde arnaıy jolaqtardyń jalpy uzyndyǵy 140 shaqyrymǵa jetpek.
Qalada pılottyq rejımde Jýkov, Ýálıhanov jáne Manaev kóshelerinde birjaqty qozǵalys engizildi. Bıyl maýsym-shilde aılarynda osyǵan uqsas sheshimderdi qalanyń basqa da kóshelerinde engizý josparlanyp otyr. Atap aıtqanda, Tımırıazev, Jandosov, Manas, Myńbaev, Beregovoı, Armıanskaıa, Aımanov jáne Pýshkın kóshelerinde birjaqty qozǵalys engizý múmkindigi qarastyrylyp jatyr.
Velosıped ınfraqurylymyn damytýǵa da erekshe nazar aýdarylǵan. Almatydaǵy velojoldardyń uzyndyǵy – 89 shaqyrym. Qosymsha taǵy 38,5 shaqyrym jańa velojol salý kózdelgen.
Sonymen qatar qalada 3 842 jol belgisi qalpyna keltirilip, aýystyrylyp nemese jańadan ornatyldy. Al jol tańbalary kóshe-jol jelisiniń 1 700 shaqyrym aýmaǵynda syzyldy.
Sondaı-aq elektrosamokattar úshin qalalyq orta erekshelikterine qaraı jańa jyldamdyq rejımderi engizilip, mıkromobıldi kólik quraldaryn paıdalaný talaptary kúsheıtilip jatyr.
Eske salaıyq, buǵan deıin Almatyda avtobýs júrgizýshileriniń jumysyn baqylaý úshin arnaıy qyzmet qurylǵanyn habarlaǵanbyz.
