Almatyda qoǵamdyq kólik jolaqysy kóterildi

ALMATY. KAZINFORM – Almatyda qoǵamdyq kóliktegi jol júrý aqysy 120 teńge boldy. Jańa tarıf tamyz aıynyń basynan bastap kúshine enedi.

Qala turǵyndarynyń biri ákim Erbolat Dosaevpen kezdesý barysynda jolaqy qashan kóteriletinin surady.

Bul saýalǵa qalalyq mobıldilik basqarmasynyń basshysy Saǵyndyq Telibaev jaýap berdi.

«Almaty qalasy máslıhatynyń depýtattary ótken aptada qoǵamdyq kólikte júrýdiń jańa tarıfin 120 teńge dep bekitti. Jańa tarıf tamyz aıynyń 3 men 5-i aralyǵynda kúshine enedi», – dedi ol.

Budan bólek, Almaty ákimi jol aqysyn bank kartasymen tóleý múmkindigi qarastyrylyp jatqanyn atap ótti.

«Ońaı» qajetti kelisimderge qol qoıyp, tólem júıesi mártebesin aldy. Sondyqtan bank kartasymen tóleý máselesi sheshiledi dep oılaımyn. Biz tólemniń barlyq túrlerin kórsettik», - dedi ákim.

Ol búginde qolma-qol aqshasyz esep aıyrysýdyń birneshe ádisin atady:

- «Ońaı» fılıaldarynda jáne klıentterge qyzmet kórsetýdiń 115 pýnktinde satyp alýǵa bolatyn kólik kartasy arqyly;
- SMS arqyly;
- mobıldi qosymsha arqyly (sheteldik qonaqtarǵa yńǵaıly bolý úshin ınterfeısti aǵylshyn tilinde engizý pysyqtalýda).

«Týrısterge Visit Almaty arqyly kirýge múmkindik berdik. Olar da qalypty túrde tóleıtin bolady. Sonymen qatar, «Ońaı» júıesi basqa qyzmetterge: murajaılarǵa jáne basqa jerlerge barýǵa tıisti jeńildikter beredi. Bul qansha kún júrgenińizge baılanysty. Sonyń ishinde metro, trolleıbýs, avtobýstarǵa otyrsa tıisti jeńildik qarastyrylady», - dedi ákim.

Osyǵan deıin Almatyda qoǵamdyq kólikte jol júrý aqysy 20 teńgege qymbattaǵany týraly jazǵan edik.