Almatyda qoǵamdyq kólik qozǵalysyn jedeldetý úshin arnaıy jolaq ashylady
ALMATY. KAZINFORM – 20 maýsymnan bastap Saın kóshesiniń Rysqulov dańǵylynan Mustafın kóshesine deıingi bóliginde pılottyq rejımde qoǵamdyq kóliktiń arnaıy jolaǵy jumys isteı bastaıdy.
Almatynyń jol qozǵalysy jáne jolaýshylar kóligin uıymdastyrý basqarmasynyń habarlaýynsha, jobany iske qosý aıasynda jol qyzmetteri arnaıy sary tústi jolaqtardy syzý jáne tıisti jol belgilerin ornatý jumysyn bastap ketti. Barlyq jumysty 19 maýsymǵa deıin aıaqtaý josparlanyp otyr.
Basqarma ókilderiniń málimetinshe, arnaıy jolaqty engizýdiń maqsaty – qoǵamdyq kólik qozǵalysynyń tıimdiligin arttyrý, jol qozǵalysyn retteý jáne qalanyń eń qarqyndy kólik dálizderiniń birinde qaýipsizdikti kúsheıtý.
– Jańa qozǵalys shemasy avtobýstardyń turaqty ári boljamdy qozǵalysyn qamtamasyz etýge, jalpy kólik aǵynyndaǵy kidiristi azaıtýǵa jáne marshrýttardyń qozǵalys kestesiniń saqtalýyn jaqsartýǵa múmkindik beredi dep josparlanyp otyr, - delingen habarlamada.
Pılottyq rejım qabyldanǵan sharalardyń tıimdiligin baǵalaýǵa jáne jol qozǵalysyna qatysýshylardyń ózgeriske kezeń-kezeńimen beıimdelýine jaǵdaı jasaýǵa múmkindik beredi. Vedomstvo osyǵan baılanysty júrgizýshilerden jol belgileri men jol tańbalaryna muqııat nazar aýdaryp, baǵytyn aldyn ala josparlaýdy eskertti.
Eske salaıyq, buǵan deıin Almatyda avtobýstar Saın kóshesiniń uzartylǵan bóligimen júre bastaǵanyn jazǵanbyz.
