Almatyda kógaldandyrý jáne abattandyrýǵa arnalǵan halyqaralyq konferentsııa ótip jatyr
ALMATY. KAZINFORM — Almatyda 23-25 qyrkúıek aralyǵynda Ósimdik pıtomnıkteri jónindegi Ortalyq Azııa qaýymdastyǵynyń (ÓPJOA) IV konferentsııasy jáne Green Spaces Expo 2026 halyqaralyq kórmesi ótýde. Іs-sharanyń ashylý saltanatyna Almaty qalasy ákiminiń birinshi orynbasary Almashan Smatlaev qatysty.
Konferentsııaǵa qalalyq ákimdikterdiń, ósimdik pıtomnıkteri men baý-baqsha ortalyqtarynyń ókilderi, sáýletshiler, ýrbanıster, landshaft salasynyń mamandary, ǵalymdar jáne túrli elderden kelgen kompanııalar qatysýda. Bıyl kórmege 15 elden 80-nen astam eksponent qatysyp otyr. Kórme ósimdik pıtomnıkteri, kógaldandyrý, sondaı-aq qoǵamdyq jáne jeke keńistikterdi abattandyrý máselelerine arnalǵan.
Almaty úshin mundaı is-sharany ótkizý qalalyq ortany damytý baǵytynda tájirıbe almasýǵa jáne zamanaýı sheshimdermen tanysýǵa múmkindik beredi. Baǵdarlama aıasynda jasyl aımaqtardy jobalaý jáne kútip ustaý, klımattyq jaǵdaılardy eskere otyryp ósimdikterdi tańdaý, sýarý júıeleri men jańbyr sýyn saqtaý, sondaı-aq turaqty qoǵamdyq keńistikterdi qalyptastyrý tásilderi talqylanyp jatyr.
Baǵdarlamanyń mańyzdy bóligi praktıkalyq oqytýǵa arnalǵan. Qalany kógaldandyrýdy basqarý salasyndaǵy mamandar úshin qarqyndy oqytý kýrstary men semınarlar uıymdastyrylyp, onda merdigerlermen jumys isteý, otyrǵyzý materıaldaryn tańdaý, ósimdikterdi otyrǵyzý jáne kútip-baptaý, sondaı-aq oryndalǵan jumystardyń sapasyn baqylaý máseleleri qarastyrylady. Sonymen qatar «Ashyq mıkrofon» formaty uıymdastyrylǵan. Eki saǵattyq sessııa barysynda qatysýshylar jetekshi sarapshylarǵa suraq qoıyp, saladaǵy naqty tájirıbelik keısterdi talqylaı alady.
Konferentsııamen qatar «Atakent» KІBS aýmaǵynda Green Spaces Expo 2026 halyqaralyq kórmesi ótýde. Munda Qazaqstan, Reseı, Germanııa, Nıderland, Polsha, Belgııa, Túrkııa, Ózbekstan, Qyrǵyzstan, Qytaı jáne basqa da elderden kelgen pıtomnıkter men óndirýshiler óz ónimderi men sheshimderin tanystyryp jatyr.
Baǵdarlamanyń qorytyndysy 25 qyrkúıekte ótetin Green Expert praktıkalyq kúnimen aıaqtalady. Qatysýshylar Almatydaǵy júzege asyrylǵan qalalyq kógaldandyrý nysandaryn, Bas botanıkalyq baqty aralap, jasyl jelekterdi kútip-baptaý boıynsha sheberlik sabaqtaryna qatysady.
Konferentsııa Almaty qalasy, Tımırıazev kóshesi, 42, 1 korpýs mekenjaıyndaǵy «Atakent» KІBS-tiń «Baqshasaraı» qabyldaý úıinde ótip jatyr.
