QQS 16% bolsa, áleýmettik salyq pen zeınetaqy jarnalaryn tóleý ózgerissiz qalady — Úkimet usynysy
ALMATY. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Almatyda bıznes ókilderimen kezdesti, dep habarlaıdy Úkimettiń baspasóz qyzmeti.
Kezdesýde kásipkerler QQS boıynsha tirkeý shegin 15 mln teńgege deıin tómendetý jáne arnaıy B2C rejımdegi qyzmet túrleriniń aıasyn taryltý máselelerin kóterdi. Salyq tóleýshilerdi tirkeý úshin reforma sheńberinde belgilengen shek shaǵyn bıznestiń odan ári jumys isteýine kedergi bolýy múmkin ekeni aıtyldy. Kásipkerler salyqtan jaltarý úshin kásiporyndaryn bólshekteýge nemese qyzmetiniń bir bóligin jasyrýǵa májbúr bolady.
— Jyl saıyn memleket QQS boıynsha esepke qoıýdyń joǵary shegine baılanysty bıznesti bólshekteýden shamamen 800 mlrd teńge tabys salyǵyn joǵaltady. Іs júzinde bizde orta bıznes bar, biraq zań júzinde joq. Bul tetikter — QQS boıynsha esepke qoıý shegin tómendetý jáne tek qana V2S úshin jeńildetilgen arnaıy rejım tetikterin engizý — kásipkerlikke qarsy kúres emes, kóleńkeli ekonomıkaǵa qarsy kúres. Salyq tóleıtin adam tólemeıtindermen adal básekelese almaıdy. Al ádil salyq salýǵa umtylýda bıznesti jappaı qoldamaı memlekettik organdar kóleńkeli ekonomıkamen tolyqqandy kúrese almaıdy, — dep atap ótti Ulttyq ekonomıka vıtse-mınıstri Azamat Ámrın.
Eńbekaqy tóleý qoryna júktemeni azaıtý boıynsha saýaldarǵa da jaýap berildi.
Kásipkerlerdiń áleýmettik salyqty jáne mindetti zeınetaqy jarnalardy tóleýin joıý boıynsha buryn usynylǵan reforma QQS mólsherlemesi 20%-ǵa deıin kóterilgen jaǵdaıda júrgizilýi múmkin edi. Onda memleket jumys berýshiniń ornyna áleýmettik aýdarymdardy jabýǵa kiris alady. Biraq qazirgi nusqada (16% QQS mólsherlemesi) áleýmettik aýdarymdardy ózgerissiz qaldyrý usynylady.
Sondaı-aq kezdesýge Qarjy mınıstri Mádı Takıev, «Atameken» UKP basqarma tóraǵasy Raıymbek Batalov, Jeńil ónerkásip qaýymdastyǵy, týrıstik kompanııalar jáne basqa da salalyq bıznes birlestikteri, 50-den astam iri jáne shaǵyn bıznes ókilderi táýelsiz sarapshylar qatysty.
Kezdesýde sport klýbtary, aqparattyq qaýipsizdik, medıtsına, jeńil ónerkásip, týrızm jáne basqa da salalar boıynsha bıznes ókilderi sóz sóıledi.
Kezdesý qorytyndysy boıynsha Serik Jumanǵarın qatysýshylarǵa syndarly dıalog úshin alǵysyn bildirip, barlyq usynys salyq reformasy jobasyn Májilistiń qaraýyna shyǵarar aldynda Úkimettegi jumys toptarynda qaralatynyn atap ótti.
Aıta ketsek, Memleket basshysy bıznes ókilderimen kezdesýde qosylǵan qun salyǵynyń mólsherlemesi saralanyp belgilenýi tıistigin aıtqan edi.
Sonymen qatar Úkimettiń QQS mólsherlemesine qatysty jańa usynysy týraly jazdyq.
Keshe Premer-mınıstrdiń orynbasary Tamara Dúısenova máselege qatysty pikir bildirdi.