Almatyda qyzylsha juqtyrǵandardyń sany 13 ese azaıǵan

ALMATY. KAZINFORM — Almaty qalasy sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly qyzylsha juqtyrýdyń basty sebepterin atady. 

Onyń aıtýynsha, Almaty qalasynda 2025 jyldyń 7 aıynda qyzylshanyń 263 jaǵdaıy tirkelgen. Ótken jyldyń sáıkes kezeńinde 3296 jaǵdaı bolǵan. ıAǵnı, aýrý juqtyrý kórsetkishi 12,8 esege azaıǵan.

— Aýrý juqtyrǵandar ishinde 14 jasqa deıingi balalardyń úlesi — 87,5% (230 jaǵdaı), jasóspirimder — 1,1% (3 jaǵdaı), eresekter — 11,4% (30 jaǵdaı). Aýrý negizinen ekpeden bas tartqan, ekpeden medıtsınalyq bosatylǵan, ekpe jasyna jetpegenine baılanysty egilmegen balalar jáne vaktsınatsııa statýsy belgisiz eresekter arasynda tirkeledi. Qyzylsha juqtyrǵan 263 adamnyń 226-y vaktsına saldyrmaǵan, — dedi Qasymhan Alpysbaıuly.

Sanıtarııalyq-epıdemıologııalyq baqylaý departamentiniń málimetinshe, osy jyldyń 7 aıynda qalanyń medıtsınalyq uıymdarynda qyzylshaǵa qarsy josparly túrde birinshi ret 19 551 bala vaktsınatsııalanǵan.

— Vaktsınatsııa júrgizý úshin DDSU sertıfıkattaǵan jáne Qazaqstan Respýblıkasynda tirkelgen qyzylshaǵa, qyzamyqqa, parotıtke qarsy biriktirilgen vaktsına qoldanylady. Josparly vaktsınatsııa turǵylyqty jeri boıynsha emhanalardyń barlyq egý kabınetterinde, vaktsınatsııa júrgizýge ruqsaty bar oqytylǵan (tájirıbeli) medıtsına qyzmetkerlerimen júrgiziledi, — dedi departament basshysy.

Eske salaıyq, buǵan deıin elde vaktsınatsııa kestesi ózgeretinin jazǵanbyz.