Almatyda qyzdar sherýi ótip, qazaqstandyqtardy referendýmǵa qatysýǵa úndedi
ALMATY. KAZINFORM – Almatyda Jańa adamdar qyzdar sherýin ótkizdi.
Aktsııa qatysýshylary «Meniń daýysym — meniń kúshim» dep, azamattardy el bolashaǵyna qatysty sheshim qabyldaýǵa belsendi qatysýǵa shaqyrdy. Belsendi qyzdardyń sherýin daýylpazdar rıtmi súıemeldep, aktsııanyń kórneki ári dybystyq sımvolyna aınaldy. Bul rıtm qazaqstandyqtardy azamattyq belsendilik tanytyp, 15 naýryzda ótetin jańartylǵan Konstıtýtsııa boıynsha referendýmǵa qatysýǵa úndedi.
Aktsııa ár daýystyń mańyzyn eske saldy. Belsendilerdiń aıtýynsha, tarıhta áıelderdiń qoǵamdyq belsendiligi kóptegen elde azamattyq quqyqtardyń keńeıýine yqpal etken mańyzdy faktorlardyń biri boldy. Bul mysal azamattardyń belsendi ustanymy qoǵamdaǵy ózgeristerge áser etip, onyń damýyna yqpal ete alatynyn kórsetedi.
Sherýge qatysqan belsendi qyzdar 2022 jylǵy referendýmnan keıin Qazaqstan jańa damý baǵdaryn — Ádiletti Qazaqstan baǵytyn bekitkenin atap ótti. Osy ýaqyt ishinde zań men tártip qaǵıdattaryna, jaýapkershilikke, adamǵa qurmetke, turmystyq zorlyq-zombylyqpen kúreske jáne azamattardyń quqyqtaryn qorǵaýǵa degen nazar kúsheıdi. Qoǵam talapshyl bolyp, qoǵamdyq máselelerdi talqylaý men sheshýge belsendi qatysa bastady.
— Búgin Jańa adamdardyń qyzdary azamattyq daýystyń kúshi men mańyzyn eske salyp, barlyq qazaqstandyqty referendýmǵa qatysý quqyǵyn paıdalanýǵa shaqyrady. Búgin daýylpazdar el tańdaǵan ózgerister rıtminde soǵylady. Eldiń bolashaǵy ózdiginen týyndamaıdy, ony óz memleketiniń taǵdyryna jaýapkershilik alyp, belsendi qatysatyn adamdar qurady, — dedi Jańa adamdar qozǵalysynyń kóshbasshysy Ásel Badenova.
Sherý zań men tártipti saqtaý aıasynda qala syrtynda ótkizildi.
Aıta ketelik Almatyda 15 naýryz qoǵamdyq kólik tegin bolady.