Almatyda qyz zorlaǵan er adam sottaldy

ALMATY. KAZINFORM - Medeý aýdanynyń № 2 aýdandyq sotynda qyz zorlaý isi boıynsha aıyptalǵan 34 jastaǵy azamatqa qatysty qylmystyq is qaraldy.

Іs jynystyq qylmysqa baılanysty bolǵandyqtan, protsess jabyq rejımde ótti.

Sot anyqtaǵandaı, byltyr 8 naýryzdan 9-na qaraǵan túni aıyptalýshy K. qalanyń túngi klýbtarynyń birinde demalyp, sol ýaqytta óziniń qurbylarymen demalyp júrgen tanysy O-men kezdesken. Budan keıin, K. ony úıine shyǵaryp salamyn degen syltaýmen óz páterine ákeldi. Ári qaraı, jábirlenýshiniń dármensiz kúıin (alkogoldik mas bolý) paıdalanyp, zorlyq-zombylyq kórsetip, jábirlenýshiniń erkinen tys jynystyq qatynas jasaǵan.

Sottalýshy K. kinásin moıyndamady jáne sottan ony aqtaýdy nemese bas bostandyǵynan aıyrmaıtyn jaza taǵaıyndaýdy ótindi.

Al, prokýror aıyptalýshyny kináli dep tanyp, oǵan 5 jyl 4 aıǵa bas bostandyǵynan aıyrý jazasyn taǵaıyndaýdy surady.

«Sottalýshynyń kinási is boıynsha jınalǵan saraptamalardyń qorytyndylary, jábirlenýshi men kýágerlerdiń aıǵaqtary arqyly dáleldendi. Sot úkimimen K. QK-niń 120-baby 1-bóligi boıynsha kináli dep tanyldy jáne oǵan 5 jylǵa bas bostandyǵynan aıyrý túrindegi jaza taǵaıyndaldy, sottalýshy jazasyn qaýipsizdigi ortasha qylmystyq-atqarý júıesi mekemesinde óteıdi», - dep habarlady vedomstvodan.

Úkim zańdy kúshine engen joq.