Almatyda qytaısha sóıleıtin gıdterdi oqytyp, biliktiligin arttyramyz – Erbolat Dosaev
ASTANA. KAZINFORM – Ótken jyly Almatyǵa «Shanhaı yntymaqtastyq uıymynyń mádenı jáne týrıstik astanasy» mártebesi berilgen edi. Nátıjesinde ShYU elderinen keletin týrıster sany 27,6% artyp, 323 myń adamǵa jetti. Bul týraly qala ákimi Erbolat Dosaev aıtyp berdi.
«Sondaı-aq, bıyl «Qytaı Halyq Respýblıkasyndaǵy Qazaqstan týrızmi jyly» bolyp jarııalandy. Jyl boıy Qytaıdyń eń mańyzdy 3 týrıstik kórmesine qatysý jáne Shanhaı, Gonkong, Beıjiń, qosymsha Sıan qalalarynda Almaty qalasynyń týrızm kúnderin ótkizý josparlanyp otyr», - dedi E.Dosaev Úkimettiń búgingi otyrysynda.
2024 jyldyń mamyr aıynda Almaty qalasynyń ákimdigi tanymal sheteldik aqparattyq portaldarda qalanyń týrıstik áleýeti týraly marketıngtik naýqandardy, blogerler men týrıstik operatorlarǵa arnalǵan týrlardy iske qosty. Olar osy jyldyń jeltoqsanyna deıin jalǵasady.
«Kórsetiletin qyzmetterdiń sapasyn arttyrý maqsatynda 2024 jyldyń maýsymynan tamyzyna deıin qytaı tilinde sóıleıtin gıdterdi oqytý jáne olardyń biliktiligin arttyrý uıymdastyrylady. Jalpy jyl sońyna deıin 15 is-shara ótkiziledi. Bul ShYU elderinen keletin týrıster sanyn 400 myń adamǵa deıin ulǵaıtýǵa múmkindik beredi», - dedi megapolıs ákimi.
Osy jyldyń shilde-tamyz aılarynda «Gastrofest» gastronomııalyq-týrıstik festıvali men Halyqaralyq konaq úı forýmyn ótkizý josparlanyp otyr.
Aıta keteıik, Almatyǵa keletin sheteldik týrıster sany 30% deıin ósip, 540 myń adamǵa jetti. Ásirese, Úndistannan, Italııadan, Ońtústik Koreıadan, Qytaı, Ulybrıtanııa jáne AQSh-tan týrısterdiń jıi keletini baıqalǵan.
