Almatyda qysqy dóńgelek baǵasy men aýystyrý qyzmeti qansha
Avtokólikterge arnalǵan jańa dóńgelekterdiń ortasha quny qansha? Dóńgelek jóndeý sheberhanalarynda shınalardy aýystyrý baǵasy qandaı, kólik júrgizýshileri bul týraly ne deıdi? Kazinform tilshisi anyqtap kórdi.
Almaty qalasyndaǵy avtobólshekter satatyn bazarlardyń birinde jumys isteıtin satýshynyń aıtýynsha, qysqy dóńgelekterdiń baǵasy ártúrli. Brendke aınalǵan japonııalyq, nemis jáne reseılik taýar túrleri aıtarlyqtaı qymbat. Degenmen aldyńǵy jyldarmen salystyrǵanda qalta kóteredi.
«Byltyr Reseıdegi geosaıası jaǵdaıǵa baılanysty shınalar qymbattaý boldy. Bıyl tórt dóńgelekti 100-180 myń teńge aralyǵynda satyp alýǵa bolady. Qorǵas ashyldy. Fırmalar kóp. Sondyqtan baǵa tıimdi bolyp jatyr. Qazir solaı. Qar jaýǵan kezde sál kóteriledi, árıne. Kazir endi qar joq eldiń qaltasy kóteretindeı baǵany ustaımyz»,- dedi satýshy Jarqyn Aıtbaev.
Kúzgi-qysqy maýsymda dóńgelek aýystyrý qyzmetiniń ortasha quny – 6000-den 10000 teńgege deıin. Dóńgelek jóndeý sheberhanalarynda shınalardy aýystyrý baǵasy ornalasqan jerine baılanysty. Máselen, qala syrtynda tórt dóńgelekti 5000-6000 teńgege aýystyryp beredi. Eger ortalyqta aýystyratyn bolsańyz qaltańyzda 8000-10000 myń teńge bolǵany abzal.
«Qazir baǵa 6000-10000 teńge aralyǵynda. Bul da ózgerip ketýi múmkin. Ásirese, alǵashqy qar túsken kúni uzyn-sonar kezek paıda bolady. Kúnine 60-70 kóliktiń dóńgelegin aýystyrymyz», - deıdi dóńgelek jóndeý sheberhanasynyń jumysshysy Aldııar Sáken.
Keıbir kólik júrgizýshileri kún raıyn eskerip daıyndyqty bastap ta ketti. Solardyń biri – almatylyq Almas Qanatbaev.
«Aýa raıyn baqylap otyramyn. Astanada qar jaýyp jatyr. Ol qar kóp uzamaı bizge de keledi. Sondyqtan búgin aýystyryp jatyrmyn. Byltyr 7 myń teńge tólegenmin, bıyl 8 myń bolypty», - deıdi Almaty turǵyny Almas Qanatbaev.
Mamandardyń aıtýynsha, ár dóńgelekti qoldanýdyń ózindik erekshelikteri bar. Qysqy dóńgelekter ortasha eseppen alǵanda 3-4 maýsymǵa tózimdi. Tikenekti shınalar qar men muz ústinde ózderin jaqsy ustaıdy. ıAǵnı jyldam toqtaýǵa múmkindigi joǵary. Al jabysqaq shınalar asfaltty unatady. Taza asfaltta tikenekti shınalarda tejelý qasıeti tómendep, dońǵalaqtardyń siresý qaýpi artady. Qysqasy, qysqy dóńgelekti tańdap alý kóliktiń qandaı jol jaǵdaıynda júretinine baılanysty.
Aıta keteıik, birinshi jeltoqsannan bastap qysqy dóńgelegi salynbaǵan kólikpen júrýge tyıym salynady.
«Qysqy ýaqytta, birinshi jeltoqsannan bastap aqpannyń sońyna deıin, «M+S», «M&S», «M S» belgileri bar, taý jáne qar belgisi beınelengen qysqy dóńgelekter salynbaǵan kólikpen júrýge tyıym salynady. Dóńgelegin ýaqytyly aıyrbastamaǵan júrgizýshilerge zań júzinde 5 AEK aıyppul salynady. Aıyppuldan bólek, kólik ıesi memlekettik nómirinen de aıyrylyp qalýy múmkin», – dedi Almaty PD baspasóz qyzmeti basshysynyń orynbasary Erkin Ótegenov.
