Almatyda qyrkúıektiń alǵashqy kúnderi mektep mańynda qaýipsizdik kúsheıtiledi
ALMATY. KAZINFORM — Jańa oqý jylynyń alǵashqy kúnderi Almaty mektepteriniń mańynda qaýipsizdik kúsheıedi.
Almaty qalasy polıtsııa departamenti Qoǵamdyq qaýipsizdik basqarmasynyń bastyǵy Tımýr Noǵaıbaevtyń aıtýynsha, qarbalas kezde 700 polıtsııa qyzmetkeri men 130-dan astam ekıpaj qoǵamdyq tártipti qamtamasyz etip, jol qozǵalysyn retteýge atsalysady.
— Jalpy bilim beretin mektepterde sol aýmaqty, oqý ornyna kireberis pen jaıaý júrginshiler jolyn jaqsy biletin polıtsııa qyzmetkerleri bekitilgen. Qyrkúıektiń alǵashqy kúnderinde olardyń jumysy kúsheıtiledi. Kólik qozǵalysy asa tyǵyz ýchaskelerde ınspektorlar qolmen retteýge kóshedi. Bul balalardyń joldan qaýipsiz ótýine, kólik aǵynynyń shamadan tys keptelis týdyrmaýyna múmkindik beredi, — dedi Tımýr Noǵaıbaev.
Onyń aıtýynsha, ereje buzyp, kóligin ońdy-soldy jolǵa qoıyp ketetin ata-analarǵa eskertý jasalady. Jaıaý júrginshiler ótkeline tym jaqyn qoıylǵan kólik balaǵa joldy kórýge kedergi keltirip, júrgizýshi jaıaý júrginshini baıqamaı qalýy múmkin. Polıtsııa kólikti ekinshi qatarmen qoımaýǵa jáne mektepke kireberis jerde keptelis týǵyzbaýǵa shaqyrdy.
— Balalardyń qaýipsizdigin tek polıtsııanyń kúshimen qamtamasyz etý múmkin emes. Bul — polıtsııanyń, pedagogterdiń, ata-ananyń, júrgizýshiler men oqýshylardyń ortaq jaýapkershiligi, — dep atap ótti Tımýr Noǵaıbaev.
Eske salaıyq, buǵan deıin Almatyda ashylatyn jańa «Keleshek mektepteri» jaıly jazǵanbyz.
