Almatyda qyrkúıekte tumaýǵa qarsy vaktsınatsııa bastalady

ALMATY. KAZINFORM – Almatylyqtar qyrkúıekten bastap tumaýǵa qarsy ekpe ala alady. Bul týraly Almatynyń sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova aıtty.

Onyń sózinshe, osy jyly jergilikti ákimshiliktiń qarajatyna osal toptaǵy adamdardy tumaýǵa qarsy egýge 250 000 doz kóleminde Grıppol plıýs vaktsınasy satyp alynady.

- Táýekel tobyndaǵy adamdardy vaktsınatsııalaý jergilikti bıýdjet qarajaty esebinen júrgiziledi. Vaktsınatsııa 2025 jyldyń qyrkúıek aıynyń ekinshi jartysynan bastap 30-qarasha deıin júzege asyrylady, - dedi ol.

Ásel Qalyqova jyl saıyn juqpaly aýrýdyń kúz-qys mezgilinde údeıtinin atap ótti. Maman tumaýdy ýaqtyly emdemeý pnevmonııa, bronhıt tárizdi túrli asqynýlarǵa, sondaı-aq júrek qantamyrlarynyń, júıke júıesindegi, sozylmaly aýrýlardyń asqynýyna ákelýi múmkin ekenin aıtty.

- Tumaý ásirese, ómirge jańa kelgen sábıler, egde jastaǵy kisiler men álsiz adamdar ómiri úshin qaýipti. Statıstıka boıynsha tumaý kezinde asqyný jaǵdaılary árbir 10-shy naýqasta ushyrasady. Álemdegi tumaýdan saqtanýdyń negizgi joly -vaktsınatsııa. Jyl saıyn Almaty qalasynda táýekeli joǵary toptarda vaktsınatsııa júrgiziledi, - dedi Ásel Qalyqova.

Eske salaıyq, BQO-da tumaýǵa shaldyqqandar sany 8,9 ese ósti.